NEUM-in mass casual leave lak thulh

National Health Mission (NHM) Employees Union (NEUM), Mizoram chuan Mizoram sorkara thil phut an neih avanga lungawi lohna lantirna atana vawiin atanga mass casual leave lak an tum chu an thulh.
NEUM hian March 21 atanga 23 chhung mass casual leave lak an tum a; mahse, sorkar hotute nen inbiakna an neih hnuah, lungawilohna lantir an tum hi an thulh tih an puang a, hetihlai hian Study Group Report lo chhuah hunah, lungawina khawp an hmu lo a nih chuan hmalakna hmachhawp a lo neih tawh anga kal zel an tum thu an sawi.
Hemi chungchanga NEUM thuchhuah chuan sorkara thil phut hrang hrang an neihte hi DP&AR changtu, Deputy Chief Minister Tawnluia hovin sorkar hotu lute an thukhawm a, hetah hian Tawnluia chuan Study Group Report chu nghak rih turin NEUM te a ngen tih an tar lang.
Tawnluia hian Study Group report hi sorkar hma lakna tur atana chhawpchhuah tur a nih avangin, hemi tel lo hian sorkarin hmalak tur chhawpchhuah a harsa a, Study Group report hi April thla chhung nghak rih turin department official-te kaltlangin NEUM-te chu a ngen tih an sawi.
NHM hnuaia thawktu Covid-19 kaiten an inenkawlna senso an chawi takte chu reimburse vek tura ruahmanna siamsak an nih tawh thu, sorkar hotute hian NEUM hruaitute chu an lo hrilh tiin, NEUM thuchhuah chuan a tar lang.
An thil phut chungchanga sorkar hotute nen an in biak naah hmasawnna a awm nia an ngaih avangin, March 21 atanga 23 chhunga mass casual leave lak an tum chu an thulh rih tih an thuchhuahah chuan an tar lang a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427