Politics inchirh-thehna leh remchanna lak tuma phar buaina kara ‘The Kashmir Files’ film hit tak lo chhuak nawlh hian India khaw haw a tidanglam chho mek a, tunah hian box office lamah cheng vaibelchhe 200 a hnaih ta.
Vivek Agnihotries siamchhuah film hi kar hnih em pawh la ni lo mah se, India politics a chawk buai viau hman a, tunah hian cheng vaibelchhe 150 a la lut der tawh bawk.
Filmstar lar Anupam Kher leh MIthun Chakraborty te chhanna film hian mipui a kokhawm viau bawk a, crtic lam pawhin sawi nep ngaihna an hre lo a ni ber. Cinema hall lama an pan zut zut mai.
Record thar nen
Hripuiin india a nuai chiam hnu lama film hlawhtling ber a tih ngam ta hial a, tunkar tawp lamah phei chuan thil mak a thlen chhoh ngei beisei niin, kar lovah cheng vaibelchhe 200 lalut ngei tura rin a ni bawk.
Tarlan tawh angin, ‘The Kashmir Files’ film hi 1990 chhova Kashmir-a Islamic Jihad thlipui na tak tleh lut huk vanga Kashmiri Pandit te a umchhuahna tarlanna film a ni a. Insuatna nasa tak thleng zui kha India chanchina hriat nuam lo tak pakhat zingah a tel nghal nghe a, a nghawng a na zui hle.