A tui neia chawhmeh i kan chuan coffee tlem thlak la, a rawng a mawi duh a, a rim a danglam phah chuang lo.
Khawizu fir/ a tak leh tak lo i hriat duh chuan tuiah tlem far la, a ral mai chuan khawizu fir ani lo. Khawizu reng reng tuiah a ral thei lo.
Atta i kan dawnin maida tham khat vel telh la, kan puar a tiawl duh.
Thingpui i lum dangdai deuha tih rimtui i duh chuan thingpui i lum laiin serthlum kawr tlem thlak ang che.
I chini dahna a hnawng anih chuan a burah toilet paper dah tel ang che.
I thil kan in tel a hip nasat i duhloh chuan telah khan chi tlem thlak hmasa ang che.
Artui pum chhum zai lep nan chemte aiah khawlla hmang la, a pan nalh duh zawk.
Dawnfawh kawr hi pho ro la, rawt sawm vek la, dahtha ang che. Soda angah a hman theih.
Alu i chhum dawmin pin in vit kual la, a keh loh bakah a hmin hma
Atta i kan dawnin a hmehnaah bawnghnute tlem telh la, a puar duh bakah a tui duh.
Fridge ah thil sa dah lut suh ang che, fridge vawngdaitu khawl a hu in a tichhe thei.
Flash a rim chhiat chuan artui pawn var leh tui chawhpawlhin thuahfai ang che.
Fanghma velna kawr hi te deuhin chan la, pho ro rawh. A ro hunah choka almira kil velah dah la, rannung a hnawt bo ang.
Gas buner bal chu tuiah soda thlak la, minute sawm vel chhum la, silfai ang che.
Oven i hman a, tihdaih thuai i duh chuan tuisik no ah dah la, chu chu oven chhungah hung mai rawh.
Silk thawmhnaw i uluk deuh i suk dawn chuan sahbawn leh surf hmang lovin shampoo hmang zawk ang che.
Thawmhnaw i nawhin, i tihhuhna tur tui kha tui vawt aiin tuilum hmang zawk ang che.
Wool i suk dawnin i sukna tur tuiah glycerine tlem telh la, a tawm tur a veng ang. Vinegar tlem telh hian a tifai zual.
I almira chhung a hnawn loh nan chalk sawm vel telkhawm la, a remchang laiah khai ang che.
Sahbawn rimtui hi te reuh te tein chan la, lehkha in tuam la, thawmhnaw karah dah rawh. Kapoor aiin a rimtui zawk a, a tangkai dan a inang reng.
Pen tui i thawmhnawah a kai chuan methylated spirit in a tihfai theih. Nail polish remover pawhin a tihfai theih bawk.
Boric powder leh maida chawhpawlh in marble tiat velin hrual mum la, choka leh chukchu awmduhna laiah dah rawh.
Beer in bang chu a saidawium chawpin chukchu awmduhna laiah zan khat hung tawp la, zingah chukchu a chhungah an lo thi teuh mai ang.
Carpet hmul chi ah thil mawm i tihkai chuan maida phul vat la, darkar chanve hnuah khuih fai ang che.
Tukverh darthlalang tui nena i hruk chuan tui a hul hmain puan nema hul hman tur a ni.
Thingpui sen leh vinegar chawhpawlh hi darthlalang nawh tlet nan a tha.
Glaze tile banga thil bal kai tam zawk hi chu nawhrehna (rubber) in a nawh reh theih.
Leather chi reng reng a chang changa glycerine hnawih hian a hmuar tur a veng a, a tihtlo bakah a ti tle duh bawk.
Thlalak hlui a hmuar emaw a bal emaw chu petrol tlem tein hru la a fai mai ang.
I bengbeh screw a thawl chuan purun varah chhun vak la, purun var chuan langtham lovin a tiban ang a, a tawt mai ang.
I bengbeh, thi, zungbun te i dah khawmna ah chalk pakhat dah tel thin ang che.
Rangkachak lem hi a rawng a kal deuh tawh chuan stainless steel bawmah aieng tlem nen thunin nghet takin chhin la, nithum hnuah a rawng chu a eng mai ang.
Rangkachak hlui deuh tihtlet i duh chuan tui so ah surf powder tlem leh aieng telh la, chumi tuiah chuan minute 3 vel chiah la, brush in nawt fai mai rawh.
Tukverh leh kawngka biang vel i hruk fai dawnin i hruk faina tuiah khawnvartui tlem pawlh la, maimawm ril awm tur a veng thei.
Naupang zana zuncheh an hrat chuan mut dawnin khawi-zu intir thin rawh.