Tun Pathianni zana neih mai tawh tur 94th Academy Awards (Oscar) chu entu an awm leh mumal lo vang, tih hlauhthawnnain a zar buai mek a, nikum khan Oscar chanchina entu tlem ber record an siam atang khan organiser lam pawh an lua a hai hle.
A bik takin, thalai leh tleirawl lamin an en tha peih lo, tih an hriatchian hnu atang phei chuan kumina neih tur Oscar Award-ah hian mit leh beng tlaina tur lamah ngaihtuahna sengin, pressure na tak hnuaiah an awm.
Tunhma zawng kha chuan Oscar award en ngei ngei a ngaihna chhan leh vang a tam angreng a, mahse social media a lar tak chinah erawh chuan ngaihthlutna a tlahniam duak duak mai. Soial media kan buaipui hluai hma kha chuan khawvela milar ber berte fuankhawmna hmun leh hun a nih vangin Mizo thalaite thleng pawhin kan ngaihven a, engnge an rawn hak ang a, engtinnge an rawn inchei dawn tih te chu kan ngaihven tak a ni thin. An thusawia te pawh kan chang thuap thin a nih kha.
Kumkhata film tha leh lar ber thlanchhuahna a nih miau avangin YouTube lar hma tawh atang khan TV lamah mit a futhuap thin kha a ni a, tunah erawh chuan OTT paltform a lo tam a, film en mai tur a pung hluai a, vawikhat hmeh keuha duhzawng en zung zung a theih tawh bawk si avangin tunhma nena khaikhin hleih theih pawh a ni tawh lo.
TikTok, YouTube leh streaming lian tak takte’n min luhchilh hnu ah hian kumkhatah showbiz zan ropui ber pawh hian viewr a ko eih theih tawh lova, manganthlak lam chu a ni ta .
Oscar producer Will Packer chuan, “Chona lian ber ni ta chu mite’n an en ngei hi a ni tawp mai. Eng emaw taka danglam bikna a nei tur a ni a, Hollwood pawn lam mite pawhin an zawmpui theih tur show a nih a ngai tel. Movei fan te ban phak a nih loh chuan eng ruai a ang chuang lovang,” a ti cfhuai raih mai.