Sweden chhim lam, Malmö khawpuia secondary school pakhata tharum thawhna thlengah zirtirtu pahnih, kum 50 bawr vel pahnih an thi tih police-in an sawi.
Tualthattua puhin zirlai kum 18 mi man nghal a ni bawk.
Tual chhung chanchinbute chuan thite hi vih an ni tih an tar lang a, puak thei lam hmanna a awm lo.
Malmö Latin School-a thawk hmeichhe pahnih hi hliam an tawrh avangin ambulance-a damdawi ina lak an nih hnuah an thi.
Thawhlehnia thuthar lakhawmtute an kawmnaah police chuan alarm a rik hnu minute 10 lekah a titu nia puh hi an man tih an sawi.
Thawm reh tak sikula officer-te an thlen chuan hliam tuar hmeichhe pahnih hi an va hmu a, a titua puh takah hi chhawng thumnaah a lo awm bawk a. Swedish chanchinbu, Aftonbladet chuan man a nih lai hian chemte leh hrei a keng tih a tar lang.
An mi man hian tun hmain pawikhawihna a neih emaw, rinhlelhawma awm emaw a la nei ngai lo tih police chuan an sawi a, an chhui zui mek zel.
Police hian Thawhlehni khan an mi man leh sikula mi dangte pawh an kawm kual bawk.
A tih chhan hriat theih a la ni lo va, zirlai hian an zirtirtute pahnih a huat chhan bik tur pawh hriat a la ni lo.
Malmö chief of police Petra Stenkula chuan a titua puhte in pawh an dap tih a sawi a, zirlai dangte kawmin thil thlen lai video-a lak fuh a awm tihte pawh an dap mek tih a sawi.
Swedish chanchinbuten amahin police a ko nia an tar lante pawh an chhui zui dawn a, mi pahnih thata puhna pawh a pawm tih a sawi a. Mi dangte pawhin emergency services hi an ko ve tho bawk.
Pawikhawihna a thlen lai hian sikulah hian zirlai leh zirtirtu 50 chuang an awm a. Police hnenah Thawh\anni tlai dar 5:12 (India-a zan dar 10:42)-ah hriattir niin a titua puh hi tlai dar 5:22-ah an man.
Police hian sikula awmte hi chhuahtirin an dap zui a; mahse, rinhlelhawm dang an hmu lo.
Zirtirtu leh zirlaite chuan police-te hi an ralthuam nen thlengin an classroom \heuhvah darkar eng emaw zat an kalh hnan tih an sawi.
Thawhlehni khan sikul chawlh an puang a, zirlaite zingah buaina avanga harsatna neih phah an awm chuan puih theihna tur an hawng bawk.