Thawhlehni zan khan mi tu tih hriat lohten chenna in eng emaw zat halin mi pariat an kang hlum.
He thil hi Rampurhat, Birbhum district, West Bengal-a Trinamool Congress member pakhat thihna a thlen hnua thleng a ni.
ANI-in a tar lan dan chuan in pakhatah ruang pasarih hmuh a ni a, Rampurhat medical college hospital-ah lak an ni a. India Today chanchinbuin a tar lan dan chuan a haltute hian inte hi pawn lamah an kalh hmasa a, a chhunga awmte tan tlan chhuah ngaihna a awm lo.
In kang a awm tih thu an hriat veleh thuneitute, police, forensic expert leh Birbhum district magistrate chuan an pan nghal a. Chanchinbumi, Pooja Mehta chuan kangmei chhuah dan tak hi hriat a la ni lo tih a sawi.
A chhui chiang turin Special Investigation Team (SIT) din a ni a. Hetah hian ADG CID Gyanwant Singh, ADG Western Zone Sanjay Singh leh DIG CID (Operations) Meeraj Khalid te an awm a. Officer-in-Charge (OC) leh Sub-Divisional Police Officer (SDPO) chu an hna a\anga chawlh lailawktir (suspend) nghal an ni tih a sawi bawk.
Times of India chanchinbu chuan Bengal-a rorel lai, TMC-a hruaitu pakhat, Bhadu Sheikh-a thah a nih hnu lawka thleng niin a tar lang a. Sheikh-a hi tual chhung rorel khawl, panchayat member niin National Highway 60 âna Thawh\annia dawra a \hu lai chu tualchher bomb hmanga beiin thah a ni.
“Hruaitu hriat hlawh tak a ni a, a chunga thil thleng avanga mipui thinrim chuan an khuaa anmahni eptu pawl chenna inte an bei ta a. Police hian Sheikh-a thihnaah hian mi pakhat man a ni tawh,” tiin an tar lang.
Times of India hian fire service-te chu kangmei chhuahna hmun an thlen thuai theih loh nan tihkhawtlai an ni bawk niin a tar lang.
The Week chanchinbu chuan Sheikh-a thah phuba lak nan hetiang hian tih a ni ta tih Communist Party of India (Marxist) chuan an sawi tih a tar lang ve bawk.
Indian Express chanchinbu pawhin Sheikh-a tualthihna chhan let nan hetiang hi a thleng niin a tar lang a. Thite hi Fatik Sheikh leh Chhota Lalon Sheikh-a chhungte vek an ni a. Fatik leh Chhota Lalon te hi Sheikh-a thahnaa inhnamhnawiha puh an ni.
Sheikh-a hi TMC-in ro an relna, Barshal khuaah hian village panchayat-a deputy chief a ni.
Hetih lai hian BJP chuan Birbhum district-a thil thleng hi CPI(M) hun laia mi thah vak vakna thleng ang hnuhma tho a nih thu leh an state-ah chuan President’s Rule hman an phut tih an sawi.
BJP thinrim
Thawhlehni zana thil thleng hi BJP chuan an dem hle a. An hruaitu, Suvendu Adhikari chuan Twitter-ah sorkar laipuia thuneitute inrawlh hial a ngtaih thu leh thil thlenna laiah hian firfiak leh inpna lian tak a thleng mek niin a sawi.
Thawhlehnia West Bengal assembly thutkhawmah pawh chawhma inkhawm tawpah BJP MLA 22-te chuan Chief Minister Mamata Banerjee-i’n thil thleng chungchang chu a sawi fiah an phut thu an sawi.
BJP MLA Shankar Ghosh chuan he thil hi Zero Hour-ah sawiho a phut laiin Speaker Biman Banerjee chuan zawhnaah telh a ni tawh lo nia sawiin a phalsak lo.
Ghosh-a hi ‘Vande Mataram’ tih leh ‘Dhikkar Dhikkar’ tia auvin saffron party MLA 40 chuan rorelna in an chhuahsan a. Assembly compound chhunga thuthar lakhawmtuten an kawmnaah nikuma assembly inthlan result a chhuah hnu atangin an state-ah politics thil avanga inthahna (political killing) a thleng nasa tih a sawi.
BJP hian chief minister chu dan leh thupek a kenkawh theih loh avanga leh dinhmun a hniam zel avangin bâng turin an phut tih Ghosh-a hian a sawi a. BJP chief whip Manoj Tigga pawhin legislature party thukhawmin chawhnu lamah an tel zui dawn leh dawn loh an sawiho nghal dawn tih a sawi.
Rorel lai, TMC chuan an aiawhin mi pahnih an tir a, Minister Firhad Hakim-a kaihhruaiin Rampurhat hi an pan tih news agency PTI an hrilh.
West Bengal Governor Jagdeep Dhankhar pawhin Thawhlehni khan Birbhum district-a tharum thawhna thleng a dem thu leh mihring dikna chanvo chu nasa taka palzutin bawhchhiat zel a ni a, dan leh thupek kenkawhna lamah thil duhawm lo zawk a thleng mek zel niin a sawi.