Mizoram Journalists’ Association (MJA)-in nimin khan an dinchampha vawi 50-na, Golden Jubilee an lawm a, Chief Minister Zoramthanga’n a hmanpui.
Zoramthanga chuan, khawvel changkang zelah chanchinbu leh TV mai ni lo, mobile phone a\angin thu thar ber ber rang takin mipuiten an hre thei tawh tih sawiin, hei hi Pathian malsawmna an dawn hmasawnna a nih rualin, a \ha lo zawnga hman palh thei tih a sawi.
Thudik lo thehdarh chu chhung leh chhung, khua leh khua, ram leh ram inhuatna thlen thei a nih avangin thudik tak puang chung sia inremna thlentu leh a \ha lam thlentu an nih theih nan \an an lak a \ul tih a sawi a, hnam dangin Mizoram hlimthla an rawn hmuh chu thuthar thehdarhtute tar lan dan azirin a mawiin a mawi lo thei a, a \ha zawng an rawn hmuh theihna tur kawng kawnga rilru sen thiam a \ul a, chu chu an mawhphurhna a ni tih an hriat tel a \ul tih a sawi.
I&PR Minister Lalruatkima chuan, “Journalist hna chu hna awlsam a ni lo a, hna zahawm tak a ni tih sawiin, dikna leh rinawmna kengtu an nih angin dah hniam theih an ni lo a, khawvel pawhin a zah a ni,” a ti.
Thudik \antu nih tum zel tur leh an chanchinbu leh thuziak chu belhchiandawl a nih theih nan fimkhur tur leh thudik zawn chhuah kawngah taima taka hna thawk turin a chah a. Sorkarin journalist-te a ngaih pawimawh thu te, sorkar term kal mekah \um nga lai press tour buatsaihsak an nih tawh thu te, journalist pension scheme pawh buaipui mek a ni a, a hlawhtlin ngei a beiseiawm thu te a sawi.
MJA Golden Jubilee lawmna, Dawrpui Multipurpose Centre, Aizawla neih hi MJA President Zonunsanga Khiangte-in a kaihruai a, MJA hruaitu ni lai leh hruaitu hluite chawimawina hun hman a ni a, I&PR Director Lallianpuii’n jubilee puala sash buatsaih a tlangzarh bawk.
MJA hian vawiinah General Conference vawi 48-na an hmang dawn a, chawhma hun hi Assembly Speaker Lalrinliana Sailo hovin hman a ni ang a, chawhnuah rorel inkhawm leh hruaitu thar thlanna hun an hmang dawn bawk a ni.
MJA hi kum 1972 March 23-ah din a ni a, MJA president hmasa ber chu chief minister hlui, Lal Thanhawla a ni a, MJA Golden Jubilee meichher chu kumin January 7 khan a lo det tawh a. District hrang hrangah pawh MJA Jubilee pual hian hun hman a lo ni tawh bawk.
Tun dinhmunah Mizoram pumah MJA member 193 an awm mek a. MJA hian naktukah General Conference an hmang nghal dawn a, kum 2022 a\anga 2024 thlenga hruaitu thar tur an thlang ang.