Mizoram Pradesh Congress Committee (MPCC) president Lalsawta’n, “Kan ram hian hun harsa a tawng mek a, kan ram hi hlemhletna hmanga rûn mek kan ni,” a ti.
Congress party hruaituten Mizoram chhim lam fanga ‘Chhim Hrut Fehchhuah’ an kalpui mekah nimin khan Bungtlang South, Serkawr leh Tuipanga hun an hmanna he thu hi a sawi a. “Min rûntute hian silai an hmang lo va, kan hrethiam lo mai mai a ni, hlemhletna hmanga rûn kan ni a, mipuiin kan chanvo kan chang thei lo \hin,” a ti.
MPCC president chuan kum 2023 inthlanah Congress-in sorkarna an chang a nih chuan tang puihna hmanga dinchhuahna khawp \anpuina an ruahman thu a sawi a. “Dinchhuah tuma tan lak ve erawh a ngai ang, \an la peih miah lote hi chu puih kan tum lo,” a ti.
Lalsawta chuan, “Mizoram hi a dingchhuak thei, keini aia ram nei chhe zawk, thlaler eng emaw zatin a khuh, Mizoram tiat lek Israel ram pawh an dinchhuah theih chuan engvangin nge Mizoram hi kan dinchhuah theih loh bik ang?” tiin, Mizoram mipui, thuawih tak, kaihhruai nuam em emten hruaitu \ha an neih phawt chuan a dinchhuah theih tih a sawi.
Congress party-in hnam tenau zawkte a ngaihtuah thin tih Lalsawta chuan sawiin, “Autonomous district council-te hi duhsak an ngai a, ruahmanna fel zawk siampui an ngai, finchhuah an ngai, kan sorkar leh a nih chuan hmasawnna a awm ngei ang” a ti a. Congress party-in hnam tenau zawkte a nekchep ngai lo niin a sawi.
Lalsawta chuan, “Autonomous district council-te hian an chanvo dik tak an chan theih nan Congress party hian kan tih tur kan ti ngei ngei ang,” a ti a. “Ka tih theih loh tur, ka tana rit lutuk tur thil ka sawi ngai lo tih lo hre rawh u,” a ti.
MPCC Vice President Lal Thanzara pawhin Mizoram hmasawnna liantham zawng zawng chu Congress sorkar hnathawh deuh vek nia sawiin, “Falkawn Referral Hospital leh medical college kan din a, Mizorama kawngpui zau pui puia laih thar zawng zawng pawh hi Congress sorkar laia bul\an vek a ni,” a ti.
MPCC Treasurer Zodintluanga Ralte pawhin, “Congress sorkar a din apiangin minority-te tan a thlamuanthlak \hin a. MNF an sorkar apiangin minority-te chanvo tihbawrhban a ni \hin,” a ti a. “District council pathuma mipuiten an aiawh an thlan chhuahte chu tihbuai an ni \hin a, an vau a, hnathawk thei lovin an siam \hin,” a ti.
Zodintluanga chuan, “Tuna district council budget an tihpun ve pawh hi sorkar hnathawkte hlawh tur chauh a ni; mipui chanvo a tel lo,” a ti a. Congress party chuan, ‘CM ka nih chuan hlemhletna a fihlim lo minister leh MLA-te ka bân ang,’ ti ngam president, CM candidate kan nei a, Pu Zoramthanga hi Congress a awm chu ni se bân hmasak ber tur a ni ang,” a ti.
Lalduhoma zin loh bill lak chungchang sawiin, Zodintluanga chuan, “MLA-ten danin min phalsak angin zinna tur bill kan la \hin a, MLA dangte chuan keimahni bakah kan chhungte nena kan zinna senso-ah kan hmang vek. Pu Lalduhoma chuan a ni lovah a lo hmang mai mai a, hriat chhuah a nih hnuah mualpho hlauvin a rul leh ringawt a ni,” a ti bawk.