Larsap Hari Babu Kambhampati chuan Mizorama kawlphetha indaih lohna thleng mek tihziaawm nan power sub-station awm mekte bul hnaiah mini-solar plant din zel turin power & electricity minister leh a thawhpuite a ngen.
Larsap hian nimin khan P&E Minister R Lalzirliana chu Raj Bhavanah a kawm a, Mizoram hmasawnna turin kawlphethaa intodelh phawt a tul nia a hriat thu te, tui luang chakna hmanga current siam ringawt bakah nizung chakna hmanga current siam kawngah mipuiin phurna thar an neih a tul hlea a hriat thu te bakah, Mizoramin power project neih belh tumna a neih phawt chuan a theihna zawnah theihtawp chhuah turin a inkau reng thute a sawi.
Minister leh a tawiawmtu, P&E official-te chu power sub-station awm mekte bul hnaiah mini-solar plant din zel turin a ngen a, roof top solar plant bunna tura sum leh paia harsatna nei lo tur, customer zawng zawngte chu P&E hnathawkten roof top solar plant hmang tel turin fuih se, a thatna leh current chhit man tihhniamna a nih dante chipchiar taka hrilh chhunzawm an ngai a ni, a ti.
Power Minister R.Lalzirliana chuan sorkar leh mipuiten kawlphethaa intodelh an duh vek a, an harsatna erawh chu project khawihna tur sum lama harsatna avang a ni, a ti a. Hydel project siamna turin sum mamawh a lian tham thin bawk si a, hmalak chak a awlai lo hle tiin, hydel project siam tumna a awm phawt chuan mipui lam atanga dodalna a awm a rin loh thu pawh larsap hi a hrilh.
R Lalzirliana chuan Mizoram chhungah hian lui luang chakna hmanga electric current siam chhuah theih zat chu MW 4,000 lai a nih thute, tuna Mizoram chhunga electric current siam chhuah chu ni khatah MW 5 atang MW 10 thleng a ni a ,Mizoramin ni khatah 144 MW vel electric current a mamawh a, Mizoram chhunga tlem siam chhuah bak zawng chu pawn lam atanga chawk luh a nih thu a sawi.
Mizoramah kawlpetha tam zawk siam chhuak turin sorkar chuan sum indaih lohna karah pawh theihtawp a chhuah mek a, tunah hian MW 24 ve ve pe chhuak thei tura chhut, Tuirini leh Tuivawl Mini-Hydel Project pawh buaipui mek a ni a; hnathawhna tur sum ngaihtuah mek niin chief minister pawhin he hmalakna hi tha a tihpui tih a sawi bawk.