LDVCA-in kum 25-na (silver jubilee) an lawm, Lawngtlai East bialtu MLA in telpui

aIZAWL: Lawngtlai district village council association (LDVCA)-in nimin khan an kum 25-na (silver jubilee) an lawm a, Lawngtlai East bialtu MLA H Biakzaua’n a telpui.
H. Biakzaua chuan chuan LDVCA chu an silver jubilee kum chu hmalakna tur hrang hrang insawhnghehna leh bulṭanna kuma hman tum turin a chah a. VC chu ram hmasawnna tura rorelna bul inṭanna, mipui nen innghenga rorelna a nih avangin a pawimawh hle tih sawiin, khaw ṭhan dan tur leh mipuite hmasawnna tur te, khaw entawntlak din tura mawhphurhnate chu VC kutah a innghat lian hle tih a sawi.
Khawtlang hmasawnna hna thawh a ni emaw, chhiatrupna thlen thulhah emaw khawtlangin an thlir ber chu khawtlang hruaitute an ni tih sawiin, H Biakzaua chuan mipuiin an rin ngam ang taka fimkhur tak leh rinawm taka hnathawk tur te, VC rorelna chu ngaihpawimawh deuh deuh a nih theih nana VC nihna chu zahawm taka vawng turtein VC member kalkhawmte chu a chah.
Lawngtlai East bial- tu MLA chuan LDV- CA chu a theih chin chinah hmalakpui zel a tum tur thu sawiin, silver jubilee lawmna senso phuhruk nan Rs. 10,000 a pe bawk.
He hun hmanpuitu Lai autonomous district council (LADC)-a Local administration department changtu Executive member C. Rongura pawhin VC te chu khawtlanga thuneihna sang tak chelhtu an nih angin, an thuneihna hmang suallo tura fimkhur turin a chah a. Khawtlang hmasawnna ngaihtuaha office leh midang an dawrnaah incheina uluk turte, khawtlang ṭhatna tura thawhhona ṭha vawngnung zel tur tea chahin, jubilee lawmpui nan Rs. 10,000 a pe ve bawk a ni.
LDVCA hi LADC hnuaia village council te inzawmkhawmna pawl niin, kum 1997 March ni 25 khan din a ni a. Member VC 104 (village council puitling 97 leh sub-village 7) an awm mek.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427