North Korea chuan Ningani khan intercontinental ballistic missile (ICBM) a enchhin tawh zinga a lian ber chu hlawhtling takin a enchhin tih a puang.
Hwasong-17 hi kum 2020-a an sipai kalrem lâm neihna hmuna an tihchhuah tawh kha a ni a, a lian hle a, mi thiam zawkte ngaihven pawh a tling.
Ningania an enchhin kha kum 2017 hnua ICBM an enchhin leh hmasak ber a ni.
ICBM-te hi hmun hla tak kap thei (long-range missile) niin United States pawh kap phak a ni a. North Korea hi hetiang enchhin hi phalsak an ni lo va, na taka hrek mek an ni.
An ram sorkar thuchhuah chuan an enchhinna hi an hruaitu, Kim Jong-un pawhin a vil reng tih a tar lang.
Carnegie Endowment for International Peace-a mi, Ankit Panda chuan an ralthuam enchhin hi North Korea tan chuan nuclear ralthuam an inchhekna lama ‘hlawhtlinna lian tak’ a tling niin a sawi.
Ningania missile kah chhin hi Japan leh South Korea sipaite pawhin an lo thlithlai a. Japanese thuneitute chuan km 6,000-a sangah darkar khat chuang a thlawh hnuah Japanese tuipuiah a tla niin an sawi.
ICBM an enchhin hnuhnung ber, Hwasong-15 ai khan a thlawk sang zawk a. Kha ralthuam kha km 4,500-a sang thlawkin kum 2017-a North Korea-in missile a enchhin ruih ruih laia a enchhin tel a ni.
Mi thiamte chuan Hwasong-15 kha a nih dan tur ang taka thuama kah a nih chuan km 13,000 zeta hla a kap phal a, US khawi lai pawh kap thleng thei tur niin an sawi.
Ningania an enchhin leh phei hi chu a hmaa mi aia thlawk sang thei leh thui thei a ni.
ICBM enchhin hi North Korea-in boruak \ha lo a siamna pakhat a ni a, UN bakah a \henawm ram leh US chuan a dem hle.
US chuan UN Security Council-in a phal loh leh a hrek mekna bawhchhiatna lian tak niin a sawi.