Aizawl: Tun hnaia Sports Minister Robert Romawia Royte-in MNF sorkar hnu, Covid-19 karah pawh state sum dehchhuah zawng zawng (GSDP) atanga leiba a tlahniam zel tia a sawi chu thudik a nih thu MNF party-in an sawi.
An thuchhuahah, sports minister hian Reserve Bank of India (RBI) official website atanga Mizoram state sorkar leiba neih dan la chhuak a, MNF sorkar hnuah Covid-19 hripui karah pawh GSDP atanga leiba percentage a tlahniam zel tih a sawi a, GSDP atanga percentage hmanga leiba chhut chu chhut dan dik ber a nih thu an sawi.
Minister thusawi chungchanga Congress party-in mipui bum thei zawnga thuchhuah an siam chu pawi an tih thu an sawi a.
“Hetianga Minister zahawm takin leiba chungchanga eptu party-te dawt sawi thin lehthala RBI official statement atanga thudik a rawn puang chhuak hi ropui kan ti,” an ti.
Minister Robert Romawia Royte thusawi a dik vek tih sawiin, “MNF sorkar hnu hian GSDP atanga chhutin sorkar leiba hi a tlahniam mek zel a ni. Hei hian kan Finance changtu Chief Minister Pu Zoramthanga sum enkawl thiamzia a tilang a ni,” tiin thuchhuah ah an tar lang.