Mizoramah African Swine Fever (ASF) vanga vawk a thih leh mek karah sorkar phalnain state pawn a\anga vawk lak luh a nasa a, vawk vulhtuten lak luh phalna pek kawngah sorkar chu strict leh zual turin an duh.
March 21, 2021-ah Lunglei district-a Lungsen-ah ASF vangin vawk a thi \an a, hemi a\ang hian ni tin vawk thi a awm a; December 30 a\angin vawk a thi ta lo a. Sorkar pawhin hri leng chu ziaawmah ngaiin February 31, 2022-a state dang leh ram pawn a\anga vawk leh vawksa a\anga siam lakluh khapna a hlip.
Tun hnaiah ASF vangin vawk thi a awm leh \an a, ASF vanga vawk thi awm \anna, Lunglei district-ah te, Champhai Electric Veng leh Aizawl district-a Sakawrdaiah te ASF vangin vawk eng emaw zat a thi leh tawh.
Hetianga ASF vanga vawk a thih leh mek karah hian sorkar phalnain state pawn a\angin vawk lak luh a nasa a. Hei hi ASF len leh \annaah Mizorama vawk vulhtuten an ngai.
Mizoram Pig Farmers’ Association (MIPFA) chuan state pawn a\anga vawk lak luh phalna pek kawngah sorkar chu fimkhur se an duh a, strict takin permit hi pe se an duh a ni.
The Zozam Times zawhna chhangin MIPFA hruaitute chuan state dang leh ram pawn a\anga vawk leh vawksa a\anga siam lakluh khapna a hlih hnu khan sorkarin dan zawm tur a duante zawm loa vawk lak luh a tam thu an sawi a, hemi vang hian dan pela chete dang turin Sihhmuia an duty \hin thu an sawi a, state dang a\anga vawk talh tur lak luhte an lo thawn kir tawh thu an sawi.
Aizawla Kulikawn veng huam chhungah pawh ASF vanga vawk thi a awm leh tak avangin local council-in thupek tichhuakin vawk chu veng dang emaw, khaw hran emaw a\anga lak luh an khap.
Khua leh veng \henkhatah ASF vanga vawk a thih leh meka bawrhsapten vawk khuakhirhna thupek an chhuah leh \an mek lai hian AH&Vety department hotute chuan hetia hri leng a reh hnua vawk a thi leh hi thil mak a nih loh thu leh thil awm dan tur zawk a nih thu an sawi.
Vety department hotute chuan ASF hi Mizoramah a awm tawh avangin \henkhatah a rawn lang leh \hin dawn tih an sawi a, “Tam tham ni lo pawhin khawi khawi emawah a khât tawkin ASF vanga vawk thi hi a awm \hin ang,” an ti bawk.