ASF lakah la zalen thei kan ni lo, fimkhur a la ngai nasa
African Swine Fever (ASF) vangin vawk tam tak an thi a, la thi ve chiah lote pawh tihhlum an ngaih phah a, nasa takin Mizoramin hri leng kan tawrh phah bakah, vawk vulha eizawng tam tak an mangang bawk. He hri hian reh lam pan zelin tunah erawh dan pangngaiin kan kalchho leh a, sorkar pawhin state dang atanga vawk lakluh leh vawksa atanga siam lakluh a phal chho leh tan ta bawk. Kan fimkhur erawh a la ngai reng dawn tih kan hriat a tha awm e.
Hetianga kan inthlahdul chhoh leh mek lai hian tun hnaiah ASF vangin vawk thi a awm leh tan a, ASF vanga vawk thi awm tanna, Lunglei district-ah te, Champhai Electric Veng leh Aizawl district-a Sakawrdaiah te ASF vangin vawk eng emaw zat a thi leh tawh a ni. Vawk vulhtute chuan kan inthlahdul leh tan vangah ngaiin, ruahmanna tha zawk deuh la awm thei se an duh a, mangan nawn leh an hlau tawh hle.
Mizoram Pig Farmers’ Association (MIPFA) hruaitute chuan state dang leh ram pawn atanga vawk leh vawksa atanga siam lakluh khapna a hlih hnu khan sorkarin dan zawm tur a duante zawm loa vawk lak luh a tam thu an sawi a, hemi vang hian dan pela chete dang turin Sihhmuia an duty thin thu sawiin, state dang atanga vawk talh tur lak luhte an lo thawn kir tawh thu an sawi a. Aizawla Kulikawn veng huam chhungah pawh ASF vanga vawk thi a awm leh tak avangin local council-in thupek tichhuakin vawk chu veng dang emaw, khaw hran emaw atanga lak luh an khap leh ta hial.
Sorkar hian ngun taka ngaihtuahin, ruahmanna tha zawk siam leh mawlh se la, ASF laka kan him theihna tur mawlh ngaihtuahah neiin, vawk vulhtute hmakhua ngai zel bawk teh se.