Israel hmar lam, Hadera khawpuiah Israeli Arab silai kengten police officer pahnih an that.
A thattute hi a bul hnai thingpui dawra inbeihna thleng zuiah counter-terrorism officer-ten an kap hlum ve nghal.
Islamic State (IS) pawl chuan he thil hi an tihah an chhal zui nghal a, tun hi jihadist pawl nena inzawmna nei Israeli Arab-ten ni reilo te chhunga Israel-a beihna \um hnih an thlenna a ni tawh.
Tun \um pawikhawihna hi Arab League ram foreign minister-te a vawi khat nan Israel-a an intawhkhawm mek laia thleng a ni.
Bahrain, Morocco, Egypt leh United Arab Emirates minister \heuhte intawhkhawma tel, Israeli Foreign Minister Yair Lapid chuan a \hutpuite chuan he thil thleng hi an dem hle hlawm tih a sawi.
Israel-a intawhkhawma tel tura châm mek, United States Secretary of State Anthony Blinken pawhin inthahna thleng a dem thu a sawi bawk.
Silai kengte chet hun hi Pathianni zan kha niin bus dinna bula mi dingte kapin police officer pahnih thi bakah hial hliam tuar pawh an awm.
CCTV-in thla a lo lak a\anga a lan dan chuan a kaptute hian automatic rifle leh handgun an keng a, an kah hlum pakhat ralthuam pawh an laksak.
A beitute hi inbeihna thlen laia a bul thingpui dawra lo awm, counter-terrorism unit officer uniform ha loten an kap hlum zui ve nghal a ni.
Police thite hi Yezen Falah leh Shirel Abukart te niin kum 19 mi ve ve chauh an ni.
A beitute hi Hadera a\anga khawchhak lam km 25 vela hla, Israeli Arab khua, Umm el-Fahm-a chengte an ni tih hriat an ni tawh.
Ni nga lek liam taah khan Israeli pali chu Israeli Arab mi, IS thuthlung vuantuin chhim lam, Beersheba-a bazarah beiin an that tawh bawk a. Hemi \uma beitu hi bus khalhtu pakhatin a kap hlum ve nghal a ni.
Israel-ah hian IS nena inzawmna neite chetna hi a thleng tam lo hle a, a hnuhnung ber chu June, 2017 daih tawha mi kha niin Jerusalem-a chem nena mi beihna thleng, police hmeichhe pakhat thihna chu IS hian an tihah an chhal.
Israeli Prime Minister Naftali Bennett chuan tun \uma thil thleng chu demin a tuartute a tawrhpui tak zet thu a sawi.
“ISIS (IS) thlawptuten Israel chhunga hetiang beihna an thlen vawi hnihna hian hlauhawm awm thar laka venhim hna thawktute insiam rem nghal a ngai tih a tilang a, kan ti nghal bawk ang,” a ti.