aIZAWL: Thingsulthliah RD block huamchhunga Mission found- ation movement (MFM) hnuaia Organic farming for sustainable agriculture production project beneficiary te hnenah thlai chi leh bungraw hrang hrang nimin khan sem a ni.
He hun hmanpuitu bialtu MLA, Minister R. Lalzirliana’n chemical fertilizer tel lova thlai thar tura hmakalna fakawm a tih thu a sawi a. He project buaipuitu MFM director R. Vanlalzauva leh a thawhpuite inpekna chhuanawm a tih thu a sawi.
R Lalzirliana chuan mahni inhaivur tur ni lova Zoram kal siam tura MFM hmalakna fakin, Sustainable organic far- ming project an kalpui chu lawmawm a tih thu a sawi a. Thingsulthliah tlangdunga chengte an thlahtute ata tawh mahni intodelh leh mahni kea ding thei deuh vek an nihna fakin, he project helai tlangdunga kalpui a ni pawh inhmeh a tih thu a sawi.
Organic farming chungchang sawiin, Mi- nister R Lalzirliana chuan khawvelin a buaipui mek a nih thu leh ram changkang leh mihausa ten Organic product an ngaihhlut zia leh ngaisan chhoh mek a nih thu a sawi a. Hetihrual hian chemical fertilizer te hmun hrang hrangah hman a lo nih tawh thin avang leh lui tui luang ten heng fertilizer te hi a ken darh ve thin bawk avangin Organic farming an kalpuina tur hmun te thlang fimkhur tur leh helai tlangdungin Organic certificate an neih ngei theihna tura dikna ngaipawimawh turin kal- khawmte chu a chah a ni.
Beneficiary thlan kawngah hleih nei hauhlova mi taima leh a tak taka thawk thin thlan an nih avanga lawmawm a tih thu R Lalzirliana chuan a sawi a. Tih tak takna nen chuan he project hi a hlawhtling ngei a rin thu sawiin, mimawl te pawh tifing thei Pathian chuan taima taka an thawhrimna chu mal a sawm ngei a rin thu sawiin, kalkhawmte a fuih bawk.
Sorkar thuchhuahin a tarlan danin, Mission foundation movement hnuaia project kalpui mek hi central sector scheme niin, za-a central funding a ni a. He project hi RD block pahnih – Thingsulthliah RD block leh Reiek RD block-ah te kalpui mek bawk a ni.