Chief Minister Pramod Sawant-a Goa sorkar term khatnaa minister hmeichhe awmchhin, Jennifer Monserrate chu Thawh\annia sorkar thar lak luhah cabionet-ah a tel ta lo va. A pasal, Atanasio Monserrate chu council of minister-a tel thar zingah a tel thung.
Sawant-a kaihhruai Goa cabinet tharah hian hmel thar an awm nual a. Monserrate bakah Rohan Khaunte, Ravi Naik leh Subhash Shirodkar te an ni.
BJP hruaitu hriat hlawh, Monserrate-a hi Panaji assembly bial a\anga thlan niin ‘Babush’ tia koh \hin bawk a ni a. Goa Legislative Assembly-ah hian term thum lai MLA a ni tawh.
Taleigao bial a\anga thlan tlin, Jennifer-i nen hian inneiin a nupui hi Sawant-a sorkar term hmasaah khan minister hmeichhe awmchhin a ni.
Monserrate-a hi July, 2019-a Congress MLA 10, BJP zawmtu zinga mi kha a ni a. Manohar Parrikar-a kaihhruai sorkarah khan town & country planning minister a lo ni tawh.
Monserrate-a ang bawka mi thar dang, Khaunte-a hi Porvorim bial a\anga tling niin Parrikar-a sorkarah khan IT, revenue, labour & employment leh planning & statistics & evaluation minister a lo ni tawh \hin.
Khaunte-a hi kum 2012 khan a vawi khat nan Goa inthlanah independent candidate niin thlan tlin a ni a. Infiamna ngaina tak niin Goa state aiawhin cricket leh basketball-ah pawh a lo chhuak tawh.
Shirodkar-a hi Siroda bialtu a ni ve thung a. Kum 70 mi niin kum 2018 khan Congress chhuahsanin MLA a nihna pawh a bansan a, BJP a zawm zui ta a ni.
Chief minister hlui, Naik-a hi Maharashtrawadi Gomantak Party a\anga bul \an niin Congress Legislative Party (CLP)-ah term nga lo tel tawhin kum 2019-a an phel \uma MLA 10 zet BJP zawmtu zingah a tel.
Thawh\annia chief minister lak luh rual hian BJP hruaitu pariat chu minister atan lak luh an ni a, lak luh inkhawmah hian an party hruaitu lawk tak tak telin Prime Minister Narendra Modi pawh a tel.