Delhi Deputy Chief Minister Manish Sisodia chuan BJP \halai, BJYM mite chuan chief minister chenna luhchilhin an bei a, CCTV camera an tihchhiat bakah venhimnna atana hungna pawh an tichhia niin a sawi a, saffron party hian Arvind Kejriwal-a chu ‘thah’ an duh niin a sawi.
“Punjab inthlanah Aam Aadmi Party (AAP)-in hnehna changa BJP an chak loh avangin BJP hian Arvind Kejriwal-a hi thah an duh a. BJP mite hian a chenna inah an luhchilh a. CCTV camera leh in kawta hungna pawh an tichhia,” tiin Sisodia chuan Nilainia thil thleng chungchang sawiin thuthar lakhawmtute a hrilh.
“BJP hian Kejriwal-a hi (inthlana) an hneh theih loh vang chauhvin tihhlum an duh a. Vawiina thil thleng hi BJP-in amah thah tuma ruahmanna an siam vek a ni,” tiin Sisodia chuan a sawi.
AAP hruaitu hian tih dan pangngai angin complaint pawh an thehlut dawn tih a sawi.
AAP hian BJP \halai inhawr khawmte hian chief minister chenna in vel pawh an suasam niin a sawi bawk.
An president, Tejasvi Surya-a kaihhruaiin Bharatiya Janata Yuva Morcha (BJYM) mite hian Nilaini khan Delhi khawpuia Civil Lines-ah, Kejriwal-a in bul lawkah Kejriwal-a’n Kashmiri Pandit-te a nuihsawh nia puhin ngaihdam dil tura phutna an lantir.
Delhi chief minister chenna ina CCTV camera dah a\anga a lan dan chuan pungkhawmte hian anmahni dalna (barricade) chu nasa taka bawhin an sutlang a, in tual lawkah an inhawr khawm a ni.
BJYM National Secretary Tajinder Pal Singh Bagga chuan an worker leh hruaitute chuan Kejriwal-a in bulah an thil phut an lantir mai nia sawiin engmah suasam an nei lo niin a sawi.
“Police-in min lo dang a, kan member leh hruaitu 20 a\anga 25 vel, Tejasvi Surya pawh telin, hren an ni a, police station-ah lak an ni a. A hnua chhuah leh an ni,” tiin news agency PTI chuan Bagga sawi a tar lang.
Delhi Police-in thuchhuah an siamah chuan ‘chawhnu dar 1:00 velah pungkhawmte chuan hungna pahnih sutlangin chief minister chenna in an thleng a, an tal nasa a, an au rual bawk a. Rawng bur tê an ken chu kawngkaah an theh a, thil \henkhat suasam leh CCTV camera tihchhiat pawh a awm,” an ti.
Police hian heng mite hi rang taka la hrangin mi 70 vel an hren thu a sawi a. Dan anga thil kalpui zui tum a nih thu Sagar Singh Kalsi, DCP (Delhi North) chuan a sawi.
Buaina bul – Kashmir Files
Delhi BJP legislator-te chuan tun hnaia movie lar tak, ‘The Kashmir Files’ chu chhiah chawi lova khawpuia kalpui turin an phut a, hemi chhan let nan hian Kejriwal chuan a thlawna chhuah an duh a nih chuan YouTube-ah dah mai turin a ti.
“The Kashmir Files hi chhiah chawitir lo turin an ti a. Chutiang a nih chuan YouTube-a dah hian engmah chawi a ngai lo,” tiin Kejriwal-a hian Delhi assembly session-ah a sawi a, member-te nuih pawh a za hle a ni.
“Engvangin nge chhiah chawitir lo tura min tih? In duh a nih chuan Vivek Agnihotri (film siamtu) hi YouTube-ah dah turin ngen ula, a thlawn vek alawm. Ni tin miin a thlawnin an en thei ang a, chu chu chhiah chawi ngai lohna chu a ni,” a ti.
The Kashmir Files tih feature film hi sorkar pawhin a fakin Prime Minister Narendra Modi ngei pawhin a lo sawi chhuak tawh a. A film hi helho tam vanglaia Kashmiri Hindu-ten Kashmir phaikuam an chhuahsan dan vel tihlanna a ni.
Sorkarin a vawrh lar avang leh BJP rorelna state-ah te chhiah an awltir avangin he movie sawihlawh tak hian sum pawh a la lut hnem tawh hle a, Rs. Vaibelchhe 300 vel a la lut tawh.
Sorkarin heti taka a chawimawi avang hian sawisel a hlawh phah angreng a. Politics thil tam tak lantir leh a hmunhma leh thil thlen dan dik tawk lo a awm avangion sorkar chuan dik lo takin a duh a tilang niin a sawi.