Vai pahnih kha an bo telh telh, sawichian lehzual nise…
Chief Minister Zoramthanga chuan an sorkar-ah vai contractor ten hmun an chan loh thu sawiin, a hmawr pawha an lan loh thu a sawichhuak a, a sangawizawnpui nia sawite lakah hian hmaiphih a tum nge, an lang lo hrim hrim tih chu mipuite zawhna a ni leh ta der mai.
Lungleia MNF mipuite hmaa thu a sawinaah CM chuan, “Congress sorkar hun atanga an contractor leh supplier, Abu Majumdar leh Kamrula tih vel mai mai hmangin min bei a. He mite pahnih hian kan sorkarah a hmawr tê pawh an khawih phak lo a ni. Heng vel mai mai bak min sawina tur hi an hre lo,” tiin a sawichhuak a, ngaihtuah zui a ngai hle.
Heng vai pahnihte hian contract hna tam tak an thawk a, an party mite ngei ngei pawhin an thik hial niin party chhunga hre deuhte phei chuan an sawichhuah tawh hial laia an pu berin hetia a sawi leh ta mai hian eng tak nghawng nei ang i maw? An sorkar-ah a hmawr pawh an khawih phak lo tak tak a nih chuan a lawmawm lamah pawh a ngaih theih ang a, mahse tuteemaw puar leh fanna thlentu ngei, hmaiphih nana sawi mai a nih erawh chuan a sawhkhawk a na hle lovang tih pawh a sawi theih ta loh e.
Majumdar-a leh Kamrula hian sorkar kan hrawn mekah hian engemaw pawimawhna leh thiltih engemaw tak zawng an nei ni ngeiin a hriat a, mipui leh party mite ngei ngei pawhin an thik rawn leh an sawi an kai tawh laia pu berin sawibo a tum nia rin theihna awm hi chiang zawka chhuichhuah dan awm ngei bawk se a va tha em.