Lengpui Aiport-ah ni tin khualzin lut leh chhuak mi 1,600 bawr vel awm ziah anga chhut a ni a, airport chei \hat hna thawh zawh a nih hnuah khualzin lut chhuak ni tin 3,000 bawr vel an awm ziah beisei a ni a; thlawhna service pawh a awm belh turah ngaih a ni.
Mizoramin airport a neih chhun, Lengpui Airport-ah hian tun dinhmunah thlawk lut khualzin mi 750 -800 inkar an awm ziah thu Civil Aviation Wing-a Principal Consultant Wing Commander J. Lalhmingliana’n The Zozam Times a hrilh a, hetiang zat bawk hi thlawk chhuak an awm a, he airport a\anga lut leh chhuak hi ni tin mi 1,600 bawr vel awm ziah anga chhut a nih thu a sawi.
Wing Commander J. Lalhmingliana chuan Lengpui Airport-a thlawhna lut leh chhuak (traffic) chu a \hang chak viau tih a sawi a, tun dinhmunah ni tin lut chhuak 1,600 awm \hin pawh a pun thuai an beisei tih sawiin, “Airport chei \hat hna kan thawh mek hi kan zawh hunah khualzin lut chhuak an pun zual kan beisei,” a ti.
Lengpui Airport-a khualzin lut chhuak pun dan tur chu sawi chian theih a la ni lo a, rin dan erawh an neih thu a sawi a. Airport chei \hat mek hi an zawh fel hunah chuan ni tin hian lut chhuak hi 2,500 a\anga 3,000 bawr vel chu awm ziah tura an ngaih thu a sawi.
Mizo mipuite thlawhna hmanga an zin tam tawh thu sawiin, “Silchar kaltlanga zin hi kan ti ta vak lo ni berin kan hria, Covid-19 leng avanga inkhuahkhirhna khauh tak siam a nih lai pawh khan thlawhna hmanga zin hi kan beisei aiin an tam zel,” a ti.
Tuna Mizorama Pawan Hans helicopter services mekin a phurh aia tam thlawhna service tumna a awm leh awm loh The Zozam Times-in a zawhna chhangin mi panga emaw, paruk emaw phur thei a service mek thu leh hei aia tam, mi pakua emaw, 10 emaw tal phur thei service-tir tuma hma an lak thu a sawi.
Mizorama Pawan Hans helicopter thlawhtir mek hi kumin June thla tawp thleng service tura tih a nih thu sawiin, “Tunah hian an thlakna tur zawngin tender kan ko mek a, ministry of home affairs (MHA)-in rem an tiha an duh ang helicopter thlawk thei tur an thlang thei dawn a nih chuan mi tam zawk phur thei rawih ngei kan tum,” a ti.
Tun dinhmunah Mizorama khaw 13-ah helicopter an thlawhtir mek a ni tih leh khaw tam zawk helicopter tlawhpawhtir ngei tuma hma an lak thu a sawi a, khaw tam zawkah helicopter a service theih nan tunah hian helipad an buatsaih belh mek thu a sawi.
Khaw pangaa helipad awm tura an ruahmanna hi a hlawhtling a nih chuan khaw 13 aia tam fe-ah helicopter a services tawh dawn tih Wing Commander J. Lalhmingliana chuan a sawi bawk.