Mizo te hi infiam ngaina leh ngamtlak te phei chu fiamthu na tak tak hmanga kah ching tak kan ni a. Lehkhathiam leh vengva tak tak pawh an talbuai fo. Inbumna vanga buai leh thlansa phul kaia tlan vut vut te thlengin hmuh tur an awm thin. Dâwt hmanga inbumna leh mipui tichi-ai a, tiralkhel thei tur thu post bakah tawngkama inhrilhriatna reng reng tih loh tawp tur a ni. Vawiin hi i theih dan leh remchan dan ang zelin midangte tan malsawmna Ni ah chantir ngei ang che.
A hnuaiah hian April Fools’ Day vanga hmun hrang hranga harsatna namen lo thleng tawh tam tak zinga langsar zual tarlan a ni:
1Kum 1998 khan Oregon radio station KSJJ a thawk DJ te chuan Ochoco tuikhuah chu a chim niin an puang a. Hei vang hian mipui sing tam tak chu an phek buai nghal a, hmun him lamah insawnin nunau tam takin harsatna an tawh phah a. Mahse, DJ lam hian ‘Inbum ni a ni a, fiamthu a nih kha’ an ti leh mai bawk si a, an thin a rim hle.
2Randy Wood-a khan a nupui hmasa chu chhaih buai a duh vangin, “Bawiha nu, i lo kal hman em? Engemaw ni te te ka hmuh ang che’ tiin a sawm a, A nupui pawh hian engmah sawi amah hmu tur chuan a lo kal ve mai a. Mahse, a thil hmuh chuan a barakhaih ngei mai. Thingkunga a lo inawk a hmu… tichuan rang takin 991 dial nghalin police a ko ta vat a. Mahse, hei hi amah tak tak ni lovin ama lem siam chawp mai mai a lo ni a. A nupui thinrim, lungawi lo chu court-ah kalin thubuai a siam sak a, Randy hian $1,000 a chawi bakah kum khat chhung jail bang a zut hiau hiau mai a ni.
3London City Hall-a thawk Glenn Holett chuan chawlh a hman hnu-a office a kal leh hmasak berah dawhkana memo lo awm chu a en a, chutah chuan report a thehluh hun chu sawn hma a nih thu leh karhnih liam ta khan a nih thu a lo inziak a. Mahse, memo-ah khan April 1, tih tarlanna a awm a. A ni pawh hian hei hi thu tak nge a thiante’n an fiam mai mai tih a hrethiam mai bik si lo. Rilru buai leh mangang chu a thinin a tuar ta lova, rilru hah vangin chhuat-ah a let tawp nghal a. Tum aia hmâ-in a hna atanga a pension a ngaih phah ta hial a. Mahse a hnu lama a hriat zui dan chuan kha thil kha inbumna mai mai a lo ni a. Heta tang chiah hian City Hall-a thawk reng rengte chu hetianga inbum tawh loh turin dan khauh tak an siam phah a, an fimkhur nasa lehzual.
4Iraq hruaitu Saddam Hussein leh a fapa Uday te khan a zâwnin kum li chhung (1998-2001) khan Iraqi mipuite chu nalh lutuk tak maiin an lo bum tawh a ni awm e. Uday hian ama pualin nitin chanchinbu ‘Bibli’ a nei a, chutah chuan 1998 khan US President Clinton chuan Iraq a hrekna a hlip dawn tiin a chhuah a. Mipuiin lawm taka an lo dawnsawn laiin, Amah vek hian fiamthu mai mai a nih thu a sawi hnuhnawh leh. 1999 khan thlatin eitur (ration) bikah Balhla, Pepsi leh chocolate te pawh a tel tawh ang a ti a, hei pawh hian lawm a hlawh hle. Hetiang deuh hian 2000 leh 2001 khan fuh zetin mipui a lo bum tawh a ni.
5Opinia chanchinbu chuan Romania rama Baia Mare Jail-a tangte chu thuneitute’n an chhuah vek dawn tih a tarlang a. Hei vang hian an chhungte hmuah tum mi 60 chuang zette chuan 2000 kum khan Jail-ah va kalin pawnah an lo nghak a. Mahse, ‘April Fool’ a nih thu an lo hrilh leh tak si-ah chuan hrilhhai takin an haw leh ta a ni. Opinia chanchinbu chuan ngaihdam a dil nghal a, khatiang em em khan an lak thu tak an rin loh thu an sawi.
6Kum 2003 khan Microsoft hmuchhuaktu Bill Gates chu thah ni awmin, CNN-in a puang tiin Chinese leh Korean website hrang hrangah a lang chiam mai a, mi tam tak an phek buai a, Korean stock market pawh 1.5% laiin a hniam hman! An talbuai thui teuh hle.