Champhaia buhfai rinhlelhah rinhlelhawmna la hmu rih lo

Champhaia buhfai lem ni ngeia hriat hmuh chhuah chu Aizawla Food Testing Laboratory-a endik a nih hnuah a lem nia han rinhlelhna tur hmuh a ni lo a, state danga Food Testing Laboratory lian zawkah endik nawn a ni dawn.
March 30, 2022 khan Champhai Venglai Presbyterian Kohhran-in Ruby Jubilee an lawm a, ruai an buatsaihah buhfai bag pakhat, Suraj tih hming chuanna buhfai an chhum chu a chhumna tuiah a pil theih loh bakah a hmin hnuah buhfai dang ang lo takin a pawh fan theih a, he buhfai an leina dawra Suraj buhfaite endik turin Aizawlah rawn thawn thlak a ni.
Nimin zing khan buhfai lem nia sawi sample-te chu Aizawlah thlenpui a ni a, Food Testing Laboratory-a endik nghal a ni.
An endiknaah hian buhfai lem a ni tih rinhlelhna tur erawh an hmuh loh thu Food & Drugs Administration-a Deputy Food Safety Commisioner Lalsawma’n The Zozam Times a hrilh.
Lalsawma chuan, “Kan han endik chinah chuan buhfaia awm tur ang chu a awmin kan hre bawk si; mahse, an han chhuma a awm dan kha a danglam deuh bawk si a, hriatthiam har kan ti,” a ti a, tuna endik hi final na a nih loh thu sawiin laboratory lian zawk, Assam-ah endik nawn turin an thawn dawn tih a sawi.
Buhfai hi plastic nia sawi chungchang chu sawi chhunzawmin, “Plastic buhfaite hi a awm an ti fo a, plastic hi mihring hriselna atan a tha lo hle a, tuna mi erawh hi chu eng chemical ber nge a nih kan hre thei rih lo a, plastic tiin kan sawi thei rih lo,” a ti.
Lalsawma chuan buhfai lem nia sawi hi mihring hriselna khawih chhe thei leh chhiatna nasa tak thlen theih a ni tih finfiah a nih chuan state tina food safety-te an inhrilh darh anga khawi state atanga lo chhuak nge a ni tihte zawn chhuah tur a nih thu a sawi, India ram pum angin an buai deuh hat a rin thu a sawi.
Ei tur pawlh danglam chu dan phal loh leh hetiang tite chu na taka hrem theih an nih thu Deputy food safety commisioner chuan sawiin,”A hremna pawh a na a, dam chhung lungin tan emaw cheng nuai tam fe chawi theihna a ni,” a ti.
Buhfai lem chungchang bakah hian ei leh in turah fimkhur a tulzia sawi tel bawkin, antam tel (oil) chu pawlh danglam thin a nih avangin ei loh a him thu leh bekang atanga tel siam erawh ei atan a him thu a sawi bawk a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427