Israel-in a luah lai, West Bank-a Jenin refugee camp an luhchhuahnaah Palestinian pahnih thatin mi dang 15-in hliam an tawrh phah bawk niin Palestinian thuneitute chuan an sawi.
Israeli sipai chuan mi firfiak nia rinhlelh an man laiin Palestinian silai kengten an lo kap an chhang let tih a sawi a. Sipai pakhatin hliam a tuar niin a sawi bawk.
Israeli sipaiten an luhchilh hi helai bul lawk khuaa cheng mi pakhatin Israel-a mi panga lai a thah tukah a ni.
Israel-ah hian chawlhkar hnih liam ta chhungin vawi thum lai beihna thlengah mi 11 an thi tawh a, an prime minister chuan an ramah ‘firfiak taka cheta mi thahna rûnpui a thlen’ an hlau hle.
Israel Defense Forces (IDF) chuan sipai leh Border Police officer-ten Ningani tuk khan Jenin hi lutin mi eng emaw zat an man a, an zinga pahnih hi Thawhlehnia Tel Aviv khawpui daia mi panga lai kap hlumtu Palestinian pa puitu nia hriat an ni.
“Palestinian silai kengten sipaite hi an lo kap a, an kap let a. IDF sipai pakhatin hliam tuarin damdawi inah lak a ni,” tiin sipaite chuan Twitter-ah an tar lang.
Palestinian health ministry chuan Palestinian \halai pahnih – Sanad Abu Atiyeh, 17, leh Yazid Saadi, 23, te chu damdawi ina lak an nih hnuah an thi niin a puang a. Hliam tuar zinga pathum chu an dinhmun a \ha lo hle niin an sawi bawk.
West Bank-ah vek hian Israeli pakhat chu Palestinian-in a vit hliam a, a vittu hi kah hlum zui a ni.
He inbeihna hi a West Bank chhim lam, Gush Etzion settlement bloc-a bus-a thleng niin Israeli sipaite chuan an sawi.
“Bus-a civil mi lo awm pakhatin lo bei letin mi firfiak hi thah a ni,” an ti.
Israeli chanchinbute chuan hliam tuar hi kum 28 mi niin damdawi inah dah a ni a, a dinhmun a \ha lo hle a, screwdriver hmanga vih a ni a. A vittu Palestinian hi kum 30 mi, Nidal Jumaa Jaafr niin Tarqumiyah khuaa cheng a ni.