Myanmar sipaiten civil mite laka hleilenna an tihlan nasat tial tial avanga nunna chân an awm belh zel avangin United States State Department chuan ram pahnih inkara palaina hna thawk lo zawng zawngte chu an rama haw turin a hriattir.
Lungawi lohna lantirtuten tun hnai nihnih-thum maiah nunna 100 chuang dawn an hloh a, US chuan an ram mi leh sate sahimna atan non-essential diplomats leh an chhungte chu koh haw a tha zawk tiin remruatna an siam.
“Burmese sipaiten mipuite thlan tlin sorkar thuneitute an nihna hlihsakin an man a. Sipai rorelna duh lovin nawrhna leh lungawi lohna lantirna a chhuah phah a, a tawp mai pawh a rinawm loh,” tiin State Department chuan thuchhuah an siam.
“Department of State-in Burma chhuahsan tura thutlukna a siam chhan chu US sorkar hnathawkte leh an chhungte bakah US khua leh tui nihna neite sahimna kan duh vang a ni a, hei hi department ngaih pawimawh hmasak ber a ni,” tiin an tar lang a. “Tunah hian palaina hna thawk lote tan chauha tih a ni na a, ni 30 dan zelah kan ennawn ang,” an ti bawk.
Thawhtanni khan US hian Myanmar nen kum 2013-a Trade & Investment Agreement an lo siam tawh chu democracy hnuaia inthlanna hmanga sorkar an siam hma chu hman an khap rih a.