Thorang bialtu MLA Zodintluanga Ralte chuan MNF sorkar kum li chhungin lo neitute leh kuthnathawktute tan budget-ah engmah dah a la nih loh thu a sawi a. MNF chu SEDP vanga sorkar, SEDP vang veka tla tur an nih thu a sawi.
A bial chhung fanga khaw hrang hrang a tlawhnaah Congress party Treasurer Zodintluanga Ralte hian thu a sawi a. Nakkum maia inthlan lo awm turah MNF sorkar hian SEDP hmathehah hmangin SEDP dawng turin chhungkaw eng emaw zat an thlang tih a sawi a, “SEDP chu chhungkaw harsate inkhai chhuah nan ti mah se, bekang leh telhawng tihte mai mai an thlantir hian chhungkaw tam tak a tibeidawng hle a ni,” a ti.
Thorang biala hmasawnna tak tak thleng hi Congress sorkar hunlai zel a ni tih sawiin, “Congress sorkar lai, kum 1998 hma lamah bus service-tir thin a ni. Mahse, MNF hian an sorkar kum 10 (kum 1998-2008) chhungin chhunzawm thei lo leh enkawl lohin an dah a. Fur lai phei chuan eng lirthei mah a lut lo,” tiin; kum 2008-a Congress a sorkar leh hnuah theihtawp chhuaha hma a lak hnuah kawngpui awmsate blacktop vek a nih thu te, lirthei luh theih lohnaah pawh luhtir vek tawh niin, PMGSY hmanga hmalak chhunzawm mek zel a nih thu a sawi.
MNF sorkarin kum 2018 atanga vawiin thlengin Thorang bial chhung kawngpui thawm thatna tur sum a la dah lo tih sawiin, “Kawng a chhe leh hle tawh a, an ngaihsak zui loh chuan tun hma ang bawkin kawng a chhe leh hle dawn a. An lo sorkar leh palh hlauh phei chuan harsatna nasa tak a thleng leh dawn a ni,” CLP Leader hian a ti.
Congress sorkarah mi harsa zawkte thleng phak budget siam thin a nih thu sawiin Zodintluanga Ralte chuan, “MNF sorkar kum li a kal hnuah lo neitute leh kut hnathawktute tan budget-ah engmah dah a la ni lo a. Sorkar hnathawk hlawh leh inrelbawlna bak budget-ah dah a ni lo,” a ti a. Minister-ten chief minister hnenah hnathawhna tur pawisa an dil a ngaih avangin minister leh MLA nih a inang reng tih a sawi.
“Congress-in sorkarna a chelh chuan budget-ah mi retheite khai chhuahna tur ruahmanna tha zawk dah leh a ni dawn a, ‘That loh theih lohna bawm’ hmangin langtlang sorkar, sorkar tha leh sorkar dik siamin mi harsa zawkte kan khai chhuak leh dawn a ni,” a ti.
Thorang bialtu hian nimin khan a bial chhung Khawlek, South Khawlek leh Dengsur te a tlawh chhunzawm a. A bial chhung khaw hrang hrang a tlawh tawhnaah chhungkaw tam tak Congress party-ah a lawm lut a ni.