Mizoram State Commission for Protection of Child Rights (MSCPCR)-in an endikna leh zirbingna a\anga a lan danin zirlaite awmna hostel \henkhat chu a chep em avangin hursualna lam hawia pawikhawihna thleng palh thei thilah a him tawk lo hle.
MSCPCR Chairman Dr C Lalsangzuala’n nimina commission office-a thu thar thehdarhtu \henkhat a kawmnaah kum 2019 leh 2019-a zirlaite awmna hostel \henkhat an endikna leh zirbingna a\ang hian zirna in hrang hrangte hi chawhrualin him thawkhat mah se, hmasawnna tur a la tam hle tih a sawi.
“Hostel \henkhatah zirlaite an inekbeng nasa hle a, kum upa deuh leh naupang zawkte thliar hran mumal an ni lo a, hostel \henkhatah chuan khum insi khupa naupangte muttir an ni a, hursualna lam hawia pawikhawihna thleng palh thei thilah pawh a him lo hle,” a ti.
Dr C Lalsangzuala sawi danin hostel tam takah inthiarna an indaih loh bakah a awmchhunte pawh a thianghlim tawk lo a, ei leh inah pawh duh thu a sam lo hle a, tukverh mumal awm lohnate a awm bawk a. Chhiatrupna thleng thei laka inpuahchahna mumal tak a awm lo tlangpui bawk.
Naupang dikna leh chanvo humhalhna kawnga hma latu, MSCPCR chairman chuan, “Sikul building leh a kaihhnawihah chuan zirna in sang lam aiin a hniam lamah naupangte an him lo deuh zawk zel a. A bikin, chhiatrupna lam thilah kangmei laka invenna leh kang\helhna hmanrua ang chi te, rikrum thila tlan chhuahna tur ruahmanna siam kawngah te hmasawn a la ngai hle,” a ti.
Hmasawnna tur leh hmabak a la tam hle tih sawiin Dr C Lalsangzuala chuan, “Thawklehkhata tih thut theih ni lo mah se, hengte hi a tahtawla hmasawn \ul zual a ni,” a ti a; commission chuan a \ul ang zela an umzui zel tur thu a sawi.
Chawlhkar thar a\anga zirna in hawn \an turah hri leng karah zirlaite himna tura Mizoram sorkarin SOP a duante pawh an zirchian tawh thu te, zirna in thuneitute pawhin SOP \ha taka an zawm chuan naupangte tan pawh a him tawka an ngaih thu sawiin, “Hri leng kara zirna in hawn \an turah hian zirlaite himna turin education dept-in SOP a duan hi \ha taka zawm a \ul dawn a. Zirlaite leh zirtirtute mai bakah nu leh pate pawhin kan tih tur leh tih loh tur tar lante \ha taka kan zawm a \ul dawn a ni,” tiin, education dept. bakah department dangte nen zirlai naupangte him nan an enzui reng tur thu Dr C Lalsangzuala hian a sawi bawk.
Zawhna chhangin MSCPCR secretary, Women & Child Development Joint Director ni bawk, Zoramthangi Chhangte chuan Mizoramah Covid-19 vanga nu emaw, pa emaw chân naupang 15-te hnenah sponsorship thla tin Rs 2,000 an pek thu te, PM-Cares a\angin chhawmdawlna Rs 50,000 pek an nih tawh thute a sawi a ni.