- Lalhruaitluanga Chawngte
Patling, kum 64 mi a ni a, kein km 1212 a kal. A rin aiin a chau lo a, “Zep lovah chuan han chauh deuh chang te chu ka nei,” a ti duh chauh!
Lalbiakthanga a ni a, March ni 15 kha a kum 64 tlin ni a ni. Mizorama district hmunpui tin hi ke-a tlawhchhuah a tum a, a tlawhchhuah hnuah Sakawrdai-ah a kal leh. February ni 8-ah a țan a, March 31 chawhnu lamah Sakawrdai a thleng. A kal thui zawng hi km 1212 tiin a chhinchhiah a, km 1-ah pen 1444 zel a pen angah a ngai. Chutianga a chhut chuan a zin kawngah hian pen 1750128 vel a pen tihnaah a ngai.
Pu Biaka tia hriat a ni a, khawvelah remna leh muanna a awm theih nan te, inpumkhatna chungchang te, tuihna humhalh chungchang te, eye donation chungchangte aupuia chawisan tumin Mizoram hi ke-a fan a tum a, mahse hri a len avangin district hmunpui tin tiin a sawr zim ta a ni. Nikum August ni 15 ațanga kumin August ni 15 thleng hian India chuan ‘independence’ kum 75-na a lawm a, chumi puala a tih chu a ni.
February ni 9 khan Vairengte ațangin a țan a, Kolasib leh Mamit te, khawthlang lam a hrut hnuah February ni 16-ah Aizawl a lut. Ni 4 a chawl a, ni 21-ah Aibawk a pan leh. Chumi hnu chuan khaw engemaw zat paltlangin district hmunpui khuate a hrut a, March ni 25 khan Saitual a thleng; tichuan district hmunpui a tlawh kim ta. Mahse ‘hmar lam hmun pawimawh a ni a,’ tiin Saitual ațang chuan Sakawrdai a pan leh a, March ni 31 khan a thleng. Sakawrdai-ah hian VC leh YMA te’n amah lawmna hun an lo hmang nghe nghe.
“Ka rin aiin ka chau lo,” a ti a, “Zep lovah chuan han chauh deuh chang te chu ka nei a,” tiin, “Pathian zarah ka chau lo e, rin aiin ka chau lo,” a ti.
Khaw hrang hrang a hrut a, thlenna tur ngaihtuah chawp a ngai țhin. Hmelhriatte leh țhiante țhian lehchhawngte a bel a, chutianga han belh tur a hriat loh chuan VC leh YMA te a bel țhin.
“Mi hi ka chungah an \ha a, min lo duat viau zel. Ka thlennate hian min duhsak a, YMA te, VC te, ka chungah an țha em em vek. Eitur te min pai a, an chungah ka lawm tak zet a ni,” a ti.
Ip (bag) akin a chhuak a, thawmhnaw hak thlak, phone leh charger a ni deuh mai. Chhang leh thei tui a pai țhin bawk. Phairuangkai-a a thlen inpain Mizopa thawkchhuak ve lem, chem pawh ken loh chu tiin a chem a lo pe a, chumi hnu chuan chem a nei ta. Damdawi, nachhawkna (paracetamol) a pai bawk a, vanneihthlak takin hei hi ei lovin a tlingtla thei.
Khaw kar kawngah pawh zin veivakte’n an hmu țhin a, an ngaihlu țhin. Pawisa pek tum te pawh an awm a, mahse a la duh lo nia sawiin, “Pawisa hi lak loh hram ka tum a, thil dang pawh lak loh ka tum a, mi tihbuai loh ka duh a. Mahse VC leh pawl te hian min pek an tum fo a, chutiangah chuan inthlahrung tak chungin ka la țhin,” a ti.
Ramhnuaiah mahniin a kal a, mahse a hlau lo. “Hlauh tur a awm hlei nem. Remna leh muanna duhtu ka ni a, tuman min tibuai lo ang,” a ti a, “Sa pawhin remna leh muanna duhtu te chu an hre ve ang chu ka ti mai,” a ti bawk.
Sum han sawi tham a seng lo tih a sawi a, ke-a kal a nih bakah pawisa hmanna tur a awm lo tih sawiin, “Zuk leh hmuam ka ti lo a, thil han lei tur hi a awm lo,” a ti.
Covid-19 vangin a tum angin a awm lo tih a sawi a, “A tir lam phei kha chu hri hluar lai kha a ni a… hrilen lai a nih avangin ka zalen lo a, khua ka thlen pawhin mi dang nen inhlat deuh hleka inbiak te a ngai a,” a ti.
Sailaluk chhuak, Lawipu-a cheng Lalbiakthanga hian nikum March thla khan Myanmar mipui a thlawpzia lantir nan Aizawl ațangin kein Zokhawthar a lo kal thleng tawh bawk. “… chau lovin kein an kal ang,” tih, Bible chang hriatchhuah phahna tham a tling awm e!
Pu Biaka zin kawng:
Vairengte – Bilkhawthlir – Kolasib – Bairabi – Mamit – Dapchhuah – Reiek tlang dung – Aizawl – Aibawk – Hmuifang – Chhiahtlang – Serchhip – Hnahthial – Lunglei – Chhumkhum – Chawngte – Diltlang – Lawngtlai – Siaha – Phawngpui tlang vel – Sangau – S Vanlaiphai – Muallianpui – Thingsai – N Vanlaiphai – Sailulak – Champhai – Khawzawl – Kawlkulh – Hliappui – Saichal – Saitual – Suangpuilawn – Kepran – Ratu – Sakawrdai.