Grape chingtute dinhmun hi ngaihtuah chian a ngai
March 25, 2022-a council of minister thukhawmin zu khapna kalpuina tura duan, Mizoram Liquor (Prohibition) Draft Rules, 2022 chu a pawm a, hetah hian wine chungchang tarlan ni lo mah se rules hi pawm a nih tawh avangin zu leh a kaihhnawih hrim hrim khap tha tihna a ni a, hemi avang hian grape chingtute an mangang a, hmalak thiam har an ti bawk a, a tul anga sorkar dawr an tum thu hriat a ni bawk.
Sorkar kan hrawn mek hian zu leh a kaihhnawih khapna an tichhuak a, a lehlam zawng tak chuan a thawven thlak ngei ang. Mahse, eizawn nana hmang, kan ram tharchhuah ngei grape chingtute dinhmun ngaihtuah tel a ni miah lo hi a fuh lo hle mai a, chhungkaw tam tak eibel in ben buaksakna tha lo tak niin a lang. Enfiah leh enzui deuh a ngai hle.
Champhai winery-a hotuten an sawi danin winery-ah hian wine bottling tawh sa case 2,884, bottle 69,216 bakah tanky-ah litre 1,60,000 an kawl mek a, tuna bottling tawh sate hi nikum hmasa, 2020-a an lakte kha a ni a; tanky-a litre nuai chuang awmte hi nikuma an lakte a ni. Kumin July thla tawpah hian grape a thar leh dawn a, tun ang reng a harsatna an tawh chuan grape tharte hi lak theih a ni ang em a hriat loh thu grape chingtute chuan an sawi a, an dinhmun hi a laiin, ruahmanna siam thiam a har hle ang. Sorkar an dawrna kawngah pawh hian rah duhawm chhuak se la, kan ram tharchhuah ngei cheibawl leh tuaihnuam dan kawng hi chu awm thei se a tha hle.
Grape chingtute hian sorkar hotute dawr turin tun karah Champhai atangin Aizawlah kal an tum thu an sawi a, wine rules siam an ngen bakah hian grape tui sawr sa thahnem tak leh wine siam tawh bottle tam tham tak an kawl mekte tihral dan tur ngaihtuahsak turin sorkar ngen an tum thu an sawi a, pa chan chang takin sorkar pawhin ruahmanna lo siampui se a va tha em.