European Commission President Ursula von der Leyen chuan tun kar chhung hian Ukrainian khawpui, Kyiv chu Vice President Josep Borrell Fontelles nen an tlawh dawn.
Twitter-ah Leyen-i thupuangtu, Eric Mamer chuan a zin tur thu hi a tar lang a. EU hruaitu lawk pahnihte hian Russia-in Ukraine an rûn meknaah Bucha khuaah civil mi 20 vel zet an that nia puhna a awm mek laiin an tlawh dawn a ni.
Bucha khuaah hian tun hnai khan civil mite inthuama inthuam ruang 20 vel hai chhuah a ni.
Moscow erawh chuan civil mite suat vak anga puhna chu nasa takin a pha a, Ukrainian special force-te miin Moscow chet dan chu an hmuh dik loh theihna tura an phuahchawp niin a sawi.
Leyen leh Fontelles-a ten an tlawh tur hi Poland, Slovenia leh Czech Republic hruaituten thla hmasaa Ukraine an tlawh hnua khawthlang ram hruaitu lawk zinga tlawh leh hmasa ber an ni ang.
Bucha-a ruang hai chhuah chungchangah hian Thawh\anni khan Twitter-ah Leyen-i chuan European Union (EU)-in a Ukraine-ah hian chhuitu tur team an tirh dawn thu leh Russia-in war crime a phur thei em tih finfiahna tur la tur an kal dawn tih a tar lang.
EU hian Russia hi Ukraine laka a chet dan avanga a hrek mek bakah hrekna dang, lungalhthei leh tuialhthei lama hrek belhna tur a dap bawk nia hriat a ni.
Thawhlehni khan EU Executive Vice President Valdis Dombrovskis chuan heng thil pahniha thil a kalpui dan tur chu chiang a la awm lo va, sawiho mek zel a ni tih a sawi niin AFP chuan a tar lang.
EU-in Russia laka hrekna na zawk a kalpui a nih chuan a member ram 27-ten an zawm nghal a ngai dawn a. Germany, Italy leh Austria ramte hi energy-a innghat lian tak an ni a. Thawh\anni khan Austrian Finance Minister Magnus Brunner chuan lungalhtheia hrek chu duhthlan theih a nih rualin uluk leh fim taka an ngaihtuah tur thu a sawi.
bucha tlawh
Ukrainian President Volodymyr Zelenskyy chuan Russia-in civil mi tam tak an thahna nia sawi, Bucha khua hi Thawhlehni khan a tlawh.
Kyiv hmarthlang lama awm, Bucha khuaah hian civil mi 20 chuang bakah hian a hlawma mi phumna hmun hmuh chhuah a ni bawk a, Russia rinhlelhna a lian hle.
Bucha-a thil thleng hi ‘war crimes’ leh ‘insuatna’ tia sawiin president hian hetiang karah chuan Russia nena inbiak pawh a khirh zawt dawn a, Kyiv hian Moscow sipai inhnukdawk chuan hnuhma duhawm lo tak tak a hnutchhiah a hlau tawh tih a sawi.
Zelenskyy-a hian Russia-in an ram a run hnua a vawi khat nan Thawhlehni zan khan United Nations Security Council (UNSC)-ah thu a sawi bawk.