Serie A hmahruaitu AC Milan chuan anmahni umtute nena an inkar tihzauhna hun nei mahse an hmang \angkai lova, Bologna nen goal inpe lovin an inhnehtawk.
Thawh\anni zana San Siro a league inkhelah hian mikhual team in an goal an venghim tlat a. Hei vang hian point khat chauhin Milan in league table-ah hma an hruai.
Kartawpah anmahni umtu pahnih Inter Milan leh Napoli te an chak ve ve avangin Milan tan inkhel pawimawh a ni a. Bologna coach Sinisa Mihajlovic chu thisen cancer avanga enkawl a nih avangin khelmual sirah an inkhel a ho thei lo.
Mualneitu lamin goal khungna hun remchang an ngah lova, French striker Olivier Giroud tauh luh tur Lukasz Skorupski dansak chu an chance neih \hat ber a ni.
Second half-ah pawh inkhel a danglam lem lova. Zlatan Ibrahimovic chu substitute bench a\anga dah luh niin ani pawhin danglamna a siam zo lo. Bologna in point khat hawn an tum hle a, inkhel tawp thlengin na takin Milan in nawr mahse an talbuai phah lo.
Milan hian kum 2011 hnua a vawikhatna atan Scudetto chawi an tum mek a, khelh sarih hmabak an la nei.
Milan coach Stefano Pioli chuan season tawp thlenga hmahruaitu nih a awlsam dawn lo tih inkhel zawhah a sawi a. “Hetiang harsatna tawhte hi chu kan inring lawk a, team zawng zawng tan chak reng hi thil awlsam a ni lo.”
“Tun kartawp hi kan tana awlsam deuh tura ngaih nimahsela kan dinhmun siam\hat kan thei lo. Season tawp thleng a harsa dawn a, Torino lakah pawh a awlsam dawn lo. Mahse a tawp thleng kan bei ang, kan inkhel leh tur chauh kan ngaihtuah.” tiin a sawi.
“Kan mamawh hunah danglamna kan siam thei lova, \um 33 hlauhawm siam mah ila kan khingpuite an inveng uluk hle. Kan tlan taima a, mahse kan hun\ha kan hloh leh \hin.” tiin an inkhel a thlirlet.