Mizoram sorkarin February 1, 2022-a state pawn a\anga vawk lak luh khapna a hliha phalna neite vawk lak luh a phal lai khan vawk 2,000 chuang lak luh hman a ni a. Tun hnaia pul hri, African Swine Fever (ASF) len leh chhan hi phalna nei dan zawm kim loten vawk an lak luh vangah vawk vulhtuten an ngai.
Kum 2021 March thla tawp lam a\angin Mizoramah ASF a leng \an tih hriat chhuah a ni a, hri a len hmain lo inven lawk nan August 9, 2020 khan state pawn a\angin vawk leh vawk sa lak luh khap a lo ni tawh.
ASF leng hi a ziaawm tawha ngaiin kumin February 1 khan khapna thupek hi hlipin department a\anga phalna lain vawk lak luh phal a ni.
Tun hnaiah ASF hri leng a hluar leh avangin April 2, 2022 khan sorkarin khapna thupek a tichhuak leh ta a, vawk lak luh phal a\anga an khap leh inkarah mi 16 hnenah Vety department-in state pawn a\anga vawk lak luh phalna a pe.
The Zozam Times thudawn danin mi 16-te hian Rajasthan, Haryana, Uttar Pradesh leh state dang, ASF len lohna hmun a\angin vawk an la lut niin vety department chuan a chhinchhiah a, vawk an luh zawng zawng hi 2,502 a ni.
Vety department-in vawk lak luh phalna an pekte hian ASF len lohna hmun a\angin vawk an la lutah ngai mah se Mizoram Pig Farmer Association (MIPFA) hruaitute erawhin vawk lak luh hi ASF lenna, state \henawm a\anga mi a ni ngei tih an finfiah thu an sawi ve thung.
Chief Secretary Dr Renu Sharma-i’n February 1-a thupek a tihchhuahah khan vawk la lut turten vawk an lak luhte chu an hriselna a \ha ngei tih chianna certificate leh CSF vaccination certficate an nei tur tih a tar lang a. Sorkar thupek erawh vawk la lut tute hian an zawm famkim lo niin MIPFA hruaitute chuan The Zozam Times an hrilh.
The Zozam Times zawhna chhangin MIPFA hruaitute chuan state pawn a\anga vawk lak luh hi an do lo a, anmahni ngei pawhin vawk chi \ha lak luhte chu an duh ngei tih an sawi a, hetihlai hian tuna khapna thupek tihchhuah leh a nih hmaa a sum nei apiangin fimkhur lo taka vawk an la lut kha chu an hrethiam lo a, \ha lo an tih hle tih an sawi.
Vawk lak luh phal a nih leh zawk chhung khan ASF len lohna hmuna mi chauh vawk lak luh tur tiin thupek awm mah se North East-a ASF lenna hmun a\anga vawk lak luh a tam thu MIPFA hruaitute chuan an sawi a. Tripura a\angin vawk lak luh a tam zual a, he state hi ASF len mekna hmun a nih thu an sawi.
Tar lan tawh \hin angin tun hnaiah ASF hri leng a hluar leh nasa hle a, Vety department-in an chhinchhiah chinah April 5, 2022 thleng khan vawk 500 chuang a thi leh tawh a. Hri vanga vawk thih \an, March 21, 2021 a\anga December 30, 2021 inkar khan vawk 30,000 chuang ASF vangin a lo thi tawh.