Kum 2020 NBA champion Los Angeles Lakers chuan tun season-ah champion ngei tumin season tirah thawm nei lian hle mahse an season a zuihral a. NBA Playoffs an khel dawn lova, play-in tournament atan pawh an tling pha lo.
Lakers hi Nilaini zing khan Phoenix Suns lakah 121-110 in an tlawm a. A zawna vawi sarih an tlawmna a ni.
Suns tan Devin Booker chuan point 32 a score a, Deandre Ayton chuan 22 thawhin Chris Paul-a’n assist vawi 12 neiin a ho.
Lakers tan Russell Westbrook chuan point 28 a score ve bawk.
Suns hi tun season-ah vawi 63 an chakna a ni a, NBA a hnehna chang hnem ber an ni a, anmahni dawttu Memphis Grizzlies aiin vawi 8 in an chak hnem.
Season khata vawi 63 an chak hi an team chanchin a an chak hnem ber \um a ni a. Nikum a Finals khel team hi kuminah champion tura rin an hlawh hle.
Hetihlai hian Lakers hi season tirah an upa lutuk tia sawisel an ni nasa hle a. Tun season-ah an upatna lang chiahin an player-te an inhliam bakah team insiamrem zung zung a ngaihin an mamawh ang result neih an harsat \hin hle.