Sri Lanka-a mipui bâng ngei tura an nawr mek an president chu a bang dawn lo tih sorkar whip chuan parliament-ah a sawi.
Gotabaya Rajapaksa-a hi mipui leh amah eptu party hruaitute chuan an ram eibar dinhmun chhe lutuk avangin nasa takin nawr mah se nawr chhuah a ni dawn lo.
Mipuite hian rei tak tak power an neih loh \hin avang leh gas, ei tur leh ni tin mamawh dang an tlakchham avangin a sorkar duh lohna hi chawlhkar khat chuang an lantir tawh.
Mipui thinrim karah hian a cabinet minister zawng zawng deuhthaw leh MP eng emaw zatin a sorkarin an chhuahsan tawh.
Amah ngei pawhin eptu MP-te chu \angrual sorkar siama \anhopuiah a sawm a; mahse, eptute hian voter-te duh chu president leh a sorkar pum bân a nih avangin a sawmna an hnawl.
Nawr na hle mah se Nilaini khan Chief Government Whip Johnston Fernando chuan parliament rorel inkhawmah, “Sorkar enkawltu leh a mawhphurtu ber a nih angin, kan president, Gotabaya Rajapaksa hi eng dinhmunah pawh ding se a bâng dawn lo,” a ti.
Rajapaksa hian Thawhlehni zan khan mipuiin nawrhna an huaihawt zel tur te, amah thlawptu MP-ten an chhuahsan zel tur leh finance minister a bân hnu lawkah emergency a puan chu a hlip thut.
President hian April 1 zana a chenna in tuala amah duh lohna lantirnaa tharum thawhna a thlen hnua emergency a puan, manna lehkha tel lova mi rinhlelh man theihna dan hman chu a hlip a ni.
Thawhlehniah khan parliament-a amah thlawptu MP 41 zet chuan amah thlawpna hnukdawkin, ‘an telna party hming \heuhva din an tum’ thu an sawi hlawm.
Sri Lanka ram hian kum 1948-a UK a\anga an indan hnua eibar dinhmuna an buai lai ber an tawng mek.
Asia chhim lam ram, ram dang a\anga an mamawh tam zawk la luttu hian an mamawh zualpui – ei tur, tuialhthei leh leh electric siamna tur leina tur foreign reserve-ah dollar an nei tawh lo.
Mipuite hian ni khatah darkar 13 chuang chuang power an nei lo va, thil man a sang a; ei tur leh mamawh dang a vâng em em bawk.
Nilaini pawh khan mipuiten ram pumah sorkar duh khawp lohna an lantir chhunzawm leh a. Mipuite hi January a\ang tawh khan an thin a rim tawh a, sorkar duhkhawp lohna hi a muanawm zawngin an lantir tawh.
Chawlhkar hnih liam ta a\ang khan an che na zual ta a, ni khata darkar 13 chuang chuang power an neih loh leh petrol station-a tuialhthei lei tur an neih lohvin a tithinrim zual.
“Mipuiin an ni tin mamawh buhfai, dhal leh an mamawh dang an nei thei lo va. Hna leh sikul kal tur pawhin bus-ah pawh an chuang thei lo,” tiin mi pakhat chuan a sawi.
Mipui hian tharum an thawh tam lo va, hmun \henkhatah politician in beih te, police nena innawrna tenau ang chi erawh a thleng nual.
UN ngaimawh emergency puan
Mipuiin sorkar duhkhawp lohna an lantir zel tur ven nan Rajapaksa chuan April 1 khan emergency a puang a, hei hi hlih leh tawh a ni a, hlih a nih hma khan United Nations chuan \ha a tih loh thu a sawi.
UN hnuaia mihring dikna chanvo lam viltu Human Rights Council chuan emergency puana inkhuahkhirhna awmte chu mipui tana him lo leh dikna palzutna a nih thu a sawi.
UN chuan police-in tharum an thawh nia sawi a awm an hriat thu leh inkhuahkhirhna siam chu ‘mipuiin nawrhna hmanga an duh leh an mamawh leh an ngaihdan an puanna dal tumna’ a ni tiin a sawi.
“Sipai chakna hman lam hawia chetna hian Sri Lanka himna a tiderthawngin a tichak lo va, an ram eibar buaina tifel tura ngialnghehna awm thei pawh a tikhawlhkham zawk,” an ti bawk.