- LALREMLIANA PACHUAU
Kum 2019 thla chawhnu aţanga Covid hri a lo darh hnu, kum 2021 kum laihawl vel aţang daih tawh khân, Zorama Ministry hrang hrangte rawngbawlna, Zoram mipuite bakah kohhranin a ngaihven a ţul thu kan lo ziak tawh a. Mahse, vut laka vawih ang chauh niin, tu vak mahin an ngaihven zui lo. Tunah zet chuan a veiawm ta ngang a ni ang, Lengzem Magazine meuhin Ministry-te rawngbawlna chungchang a rawn thai lang ta a nih hi.
Hripui vanga kohhran rawngbawlna a chawlh ţhuap lai pawh khân, Ministry hrang hrangte chuan hun awl pawh nei thei lo lékin rawng an bawl mawlh mawlh reng a. A ni telin an rawngbawlna chhimtu an pung tial tial a, a bik takin ţhalai lam an hip nâ zual. An rawngbawlnaah Thlarau Thianghlim hnathawh hai rual loha hmuh tur awm zelin, thlaraua rilţam ngawih ngawihte’n duham takin thlarau ruai chaw an kil ţhin.
Utube kal tlanga heng Ministry hrang hrangte rawngbawlna hi i chhîm a nih ngai chuan, Zoram kohhran inkhawm urhsun leh puithu tak, tak run chunga Pathian kan biak dan ang lo takin, boruak zalen tak hnuaia mi chi hrang hrang, incheina inang lo tak tak inbel, awrâwl tawp tawpa zaia ţawngţai bawrh bawrh, tu ma mitmei veng lova mahni remchan dan ang ang, Thuthlung Bâwmin Jerusalem a pan nia Lal Davida thlarau chan ang changa inkhawm i hmu ţhin ang. Lem han chang hmêl pu reng i hmu lo ang.
He an inkhawm dan danglam tak, Zoram kohhrante inkhawm dan nen khaikhina chhim leh hmar ang hlauh hi, kohhran mi tak tak kan tihte zingah hre thiam lo an awm náwk hi a mak lem lo. Jeans leh T shirt nena Pathian biak chu kan hnam nunphungah thil tihawm lo tak a ni tlat a ni. Mahse, tun huna ţhalaite nunphung, khawsazia leh Pathian an biak dan leh pawl dan a nih tlat si avangin, Zoram kohhrante pawhin Amen kan lo pêk ve mai a ngai ta a nih hi.
Eng vangin nge Zoram ţhalaite’n heng Ministry-te rawngbawlna hi an bawh huam huam? Lengzem sawi thawi ang deuhin heng Ministry-te rawngbawlna hi a tunlai tlat a, a hahdamin a awlsam hle bawk. Kohhran in uapna urhsun tak lak ata zalen taka Pathian biakna niin, mawhphurhna kawp ţun chunga rawngbawlna ang ni lo, duh thâla zalena Pathian pawl theihna hmun a ni tlat. Kohhran inkhawm chu dan anga inkhawmnaah a chan mêk laiin, Pathian pawl duh tak takte inkhawmnaah Ministry rawngbawlna hi inher rem thung.
Sap ram kohhran tluchhe tate ang bawka ţhalaite sukthlek leh, an nun inthlak danglam dan mil zawng ni lo, kan kohhran kalphung ngai reng kan sahuai thing vawn tlat zawngin, Zoram kohhrante hmabak hi a êng viau lo thei tlat a ni. Eng vangin nge mite’n Ministry rawngbawlna an chhim tam tial tial? A bul berah chuan an rawngbawlnaah hian thlarau ruai chaw kil tur a awm tlat vang a ni. Thlarau chaw mai bakah tisa damna; taksa leh thlarau damna a awm miau a, chu chu miin thlahlelin an pan mai a lo ni.
Heng Ministry-te rawngbawlna ka chhim ve aţanga lang chiang tak chu, kohhran an ngai pawimawhin an zah hle a. Kohhran kalh zawnga khawsak leh rawngbawl an hlau ngawih ngawih bawk. Kohhran Doctrine leh thurin kalh zawnga rawngbawl tumna an nei lo a. An zinga mi tam zawkte pawh kohhrana rawngbawltu leh chanvo pawimawh nei an ni. Hun hnuhnunga Zorama Harhna lo thleng tura zawlneite sawi lâwk kawng sialtu an nih ngei ka ring tlat bawk.
A enga pawh lo ni se, kan zavaia innghahna chu Lal Isua a nih tlat avangin, tu mah inen hrang tur kan awm chuang lo a. Rotekawla se pa ang maia ro hran rèk tur kan ni bawk hek lo. Kohhrante zawkin Ministry-te rawngbawl danah entawn tur erawh kan nei niin alang. Thu sawi apiang a nung tlângpui a, Pathian thutak, kan nitin nuna a taka hman nghal theih leh hman nghal tur sermon sawiin, a ngaithlatu apiangte’n thlarau lam chaw ei tur an nei ziah hi, kohhrana thuhriltute entawn tur a ni ngei ang.
Tin, tun hun hnuhnungah hian thinlung zawng zawnga Pathian zawnga Pathian pawl duh ţhalai an rawn inlar sup sup tih hi, Zoram kohhran hian a hmu lo palh hlauh ang tih a hlauhawm ngawt mai. Heng mite hian kohhran kalphung pangngai, dan anga inkhawmnaah an khamkhawp an hmu zo lo hi, dem mai lova mahni lam inenfiah nân kan hmang ngam a nih zawk chuan, Zoram kohhrante hian nasa takin hma kan sawn phah ngei a rinawm. Kan inkhawm tam zawkahte hian, thlarau ruai chaw kil tur a awm lo tih meng ik tân chuan hai rual a awm si lo a.
Chuvang tak chuan, Zoram kohhrante pawhin heng Ministry-te rawngbawlna hi kan ta neih a hun ta. Kan ângchhûnga an rawngbawlna kan sengluh a hun ta bawk. Lengzem sawi ang takin, kan kohhran Hall-te pawh Ministry-te rawngbawl nân hawng ngam ţan ila, an rawngbawlnaah a tam thei ang ber kohhran mite tel ve kan tum a ngai ta. A nih loha kan ţhalai rualte do zawng leh ep zawnga kohhran ber kan khawsak vaih chuan, a chan chhe tur zawk kan ni ngei ang tih a rinawm tlat a ni.