- Thangkhuma (T-a)
Judo black belt Vladimir Putin chuan Russian President a nih chhungin tum a nei a, Soviet Union ram ropui tak kha a thinlung chhung rilah a riak reng.
Ukraine lak tuma a rûn hma daihin he a \henawm ram hi sipai chakna hmangin a tibuai fo tawh a, March 2014 khan Ukraine thuneihna hnuaia awm \hin Crimea a chhuhsak.
Ukraine ram chhunga khawpui lian pahnih Donetsk leh Luhansk-ah Russian \awng hmangtuten inlak hran an duh a, tuma awp lova anmahnia zalenna hran neih tumin an hel. Russia-in thlawpin he lai ram bial, Donbas region an tih hi \hen hranin a awm phah hial.
Minsk inremna hmangin inkahhai leh thuthlung dang ziak mah se, February 24, 2022-a Russia-in Ukraine a rûn hmain Donbas bialah hian ralthuam hmanga inbeihna a chhuak a, Russia-in \anhmum siamna remchangah a hmanga ngaih a ni.
Syria buainaah Putin-a thupekin Russia a inrawlh bawk a, sorkar \ha lo paihthlak tumin helna a chhuak. Russia-in Syrian sorkar \anpuiin hel pawl a bomb nghek a, thil awm dan thlithlaitute a barakhaih.
US leh NATO huanga a thawhpui ramte nen inhmuh thiam lohna an nei fo va, heng thilte avang hian kum 69 mi Putin hian khawvel pumah thiltihtheihna neiin Russia siam len a tum tih a zep lo.
SOVIET THISEN
2000 khan Boris Yeltsin thlakin Russia President a ni \an a, 2004-ah a vawi hnih nan a tling leh. Term thum a zawnin President a nih theih loh avangin 2008-2012 chhungin thunei takin Prime Minister a ni a, 2012-ah a vawi thum nan President ni lehin 2018 khan kum ruk ni zui turin a tling leh a ni.
1953 khan Soviet Dictator Joseph Stalin a thi a, ani hnuah hian Putin hi Kremlin (Russian rorel khawl) hruaitu ni rei ber a ni. 2024-ah term li President a nihna tawp tur a nih laiin, inhnialna leh sawiselna karah an ram danpui tidanglam turin ram pumah vote an thlak. A tum anga thil a kal avangin 2036 thleng Kremlin hruaitu a ni thei dawn a, ngaih \ha takin a duh hawi zawngin a che ta a ni ber.
Soviet hunlai angin Putin hian khawvel a thlir a, amah hi USSR a keh darh hmaa an secret service hmingthang tak KGB spy zinga mi a ni. Sipai a lamtir dan pawh Soviet chin danphung ang tak a ni a, Stalin-an sipai a chet veltir dan an khap tawhte pawh a tharthawh leh.
US President a nih hlim khan Joe Biden chuan ‘Mi Thattu’ tiin Putin-a chungchang a sawi tawh a. A chhan chu 2020 US President inthlanah Russia inrawlhin Donald Trump a tlin theih nan cyber hacking liantham tak an kalpui tiin a puh bakah, hetih hunlai leh a hma a\ang tawha Ukraine laka a chet dan rawva tak vang a ni tel.
1991 khan ram hrang 15-ah USSR a keh darh a, Putin chuan ‘kum zabi 20-na chhunga ramri leh inrelbawlna kawnga chet sualna lian ber,’ tiin a sawi a, Russia hnaih lama NATO-in huang an zauh zel chuan a lai a khei thuk hle.
2014 a\angin NATO-in an ram hnaiah ralthuam an chhek chhuanlamin Ukraine ramri hnaihah sipai \anhmun a siam belh nasa a, khawthlang ramte laka hlauhthawn a neih vang niin a sawi.
NAVICHOK LEH NAVALNY
A ram awp chhungah Putin a tla nâ viau a, a bikin kum naupang lam aiin upa lamin an duh hle. Mahse, hun a kal a, mipui zingah hruaitu thlak duhna a lian chho ve zel.
January 2021 khan Russian \halai sang telin ram pumah langsar taka Putin-a dodaltu Alexei Navalny an thlawp tih an lantir a, ani hi Berlin a\anga Moscow-a a haw hnu lawkah an man a ni.
2020 khan kawtthlerah nasa takin Navalny thlawpna leh Putin dodalna an lantir tawh bawk a, police-in sang emaw zat an mah nghe nghe.
Navalny hian huaisen takin Putin-a rorelna leh chet dan a sawisel a, eirukna laka fihlim lo a nihzia a sawi bakah Putin-a kaihhruai Russia chu ‘rukru leh suamhmangte puk’ ang hialin a sawi.
Navalny hi thil kal daih tawhah thubuai siamsakin sawisel theih takin tan inah an khung a, a hriselna a pan em em. Russia rama eirukna dotu pawl leh khawthlang ramte chuan politic thila an mil loh zawng a nih avanga thubuai siamsakah an ngai a, European Court of Human Rights chuan a nun tana hlauhawm a nih avangin lung in a\anga chhuahtir turin thutlukna a siam bawk.
August 2020 khan Russia-in ralthuam atan a hman \hin tûr hlauhawm tak Novichok hmangin hrai a ni a. Thi lova ruangin Navalny a \ha chhuak hram a, a titu chiang taka hriat ni lo mah se Putin leh a sorkar chungah rinhlelhna a nasa em em.
2018 khan Russian spy ni \hin Sergei Skripal leh a fanu Yulia chu an chenna England-ah Novichok thovin hrai an ni tawh bawk. Russia sorkar hma lakna rapthlak taka ngaih a ni a, chutih rualin Skripal hi thi lovin a dam chhuak leh.
Thil thlenga an puhnaah Putin pha viau mah se amah dodal leh a sorkar tana pawi khawih theitu chu dah \hat mai hreh lova ngaih a nih phah a, khawvelin amah an hmuh dan danglam hret hretin a chhe zawngin boruak a nei lian tial tial.