Vawk hri leng hi fimkhur tawk loh vang bawk a ni em?
African Swine Fever (ASF) vangin vawk a thi leh nual ta mai a, sorkar in vawk lakluh leh vawksa atanga thilsiam lakluh phalna a pek chhung reilote a dan dik lo a la luttute vang a nih thu vawk vulhtu pawlte chuan an sawi a, an sawi bak hi puh tur dang a van thu an sawi bawk.
Sorkar laipui atangin chhawmdawlna tlem a rawn kal a, vawk chantute pawhin an dawn kim hmaa hetia hri a rawn leng leh ta mai hi a pawi hle a, khuahkhirhna leh khapna na zawk kan mamawh a ni. Sorkar pawhin theihtawp a chhuah zel bawk niin a lang a, hri leng a ziaawm deuh hunah pawh phalna a pekten an lakluh dan hi ennawn zuiin, fir lehzuala endikna hna an kalpui a tul hle tawhin a hriat.
Tun hnaiah ASF hri leng hi a hluar leh avangin April 2, 2022 khan sorkarin khapna thupek a tichhuak leh a, vawk lak luh phal atanga an khap leh inkarah mi 16 hnenah Vety department-in state pawn atanga vawk lak luh phalna a pe a, heng mite hian Rajasthan, Haryana, Uttar Pradesh leh state dang, ASF len lohna hmun atangin vawk an la lut niin vety department chuan chhinchhiahin, vawk an luh zawng zawng hi 2,502 a ni.
Vety department-in vawk lak luh phalna an pekte hian ASF len lohna hmun atangin vawk an la lutah ngai mah se Mizoram Pig Farmer Association (MIPFA) hruaitute erawhin vawk lak luh hi ASF lenna, state thenawm atanga mi a ni ngei tih an finfiah thu an sawi ve thung. Tripura atangin vawk lak luh a tam zual a, he state hi ASF len mekna hmun a nih thu an sawi bawk. Hei tak hi a pawi lai, enfiahna fumfe awm that tawk loh vang a ni bawkin a hriat a, sorkar hian phalna a pekte ngei pawh endik zuiin, chhun leh zan sawi lova an vawk lakluh dan a dik em tih thlenga a enzui hi a tul hle a ni.