Aizawl SP C Lalruaia chuan tun hnaiah Aizawl khawpui chhungah rukruk a hluar thu leh kumina thubuai ziah luh zawng zawng zaa 69.64 chu rukruk thubuai a nih thu a sawi.
Nimina thuthar thehdarhtute a kawmnaah Aizawl SP C Lalruaia chuan kumin January leh March thla chhung khan Aizawl khawpui chhunga police station pali-ah thubuai 572 ziahluh tawh niin, heng zinga thubuai 397 (69.64%) hi rukruk thubuai a nih thu a sawi.
C. Lalruaia chuan rukruk chungchang bika thil bo zinga langsar zualte chu mobile phone, lirthei (two wheeler), lirthei battery, tui pipe leh meter, fire hydrant coupling, thawmhnaw leh mobile phone tower kilhna hmanrua leh part dangte an nih thu a sawi a. “Zirchianna a\anga a lan danin, thil bote hi awlsam taka hralh chhawn leh mai theih thil an ni hlawm a, hralh chhawn leh awlsam an nih vanga rukbo nasat an nih ngei a rinawm,” a ti.
Aizawl SP chuan mi thil ruk lo leichhawngtute hi a rutute nena angkhat an nih avangin thil ruk lo leitute chu IPC section 411-in a sawi angin man chhuah an nih chuan dan angin hrem theih an nih thu a sawi a. Thil ruk nia rinhlelh, a man pangngai aia tlawm uchuak te, a neitu tak hmel pu lo mi rinhlelhawm deuh hnen a\anga lo leite chu an umzui zel tur thu a sawi.
Thil bo zingah awlsam taka lak mai theih te, zing \awng\ai inkhawm leh zing kara chhuakten kawngkhar kalh loa in chhuahsan an awm \hin chu rukrute hian remchangah an hmang duh hle tih sawiin, mipuite fimkhur turin a chah a. Rukruk chungchangah emaw, harsatna neite chuan darkar 24 chhung biakpawh theiha awm Emergency Response Support System (ERSS) – 112 bepawp thuai \hin turin mipuite a chah bawk.
“Thil rinhlelhawm tih hriat ngawih ngawih, a man pangngai nena inthlau lutuk te, a zuartu hmel en reng renga rinhlelhawm, a ken tel tur document pawh nei mumal lote chu IPC Section 411-in a sawi anga man tel zel an ni tawh dawn a. A hremna hi kum thum thleng tan emaw, pawisa chawi theih, bail theih loh (non-bailable) a ni,” tiin C Lalruaia chuan, hetiang laka buaina an tawh loh nan fimkhur turin mipuite a chah nghal.
Zawhna chhangin Aizawl SP hian, tun hnaia social media-a lo lang, Aizawl Chanmari-a lirthei intlansiak chungchang chu bawhzui a hmalak nghal a nih thu a sawi a. Hemi chungchangah hian mi pakhat chu man ni tawhin, mi dangte pawh man tura hmalak mek zel a nih thu leh thubuai siamsak an nih tur thu a sawi.
The Zozam Times zawhna chhangin C Lalruaia hian March thlaa Durtlanga bomb puak nia rinhlelh chungchang chu chhui zawh a la nih loh thu leh, hemi chhui hna thawk turin tuna chhui hna thawk mekte bakah Special Investigation Team (SIT) din ni tawhin chhui hna thawh mek zel a nih thu a sawi bawk.
C Lalruaia chuan tun dinhmunah Aizawl khawpui chhungah zan lama mipui venhimna kawngah police duty a hranpaa inruat belh tumna a awm loh thu te, zan lamah patrolling chu zing zawka tih an tum thuin The Zozam Times zawhna a chhang bawk a ni.
Police station phone no:
Aizawl Police Station – 0389-2322375/8794747291
Bawngkawn Police Station – 0389-2340758/8794747292
Vaivakawn Police Station – 0389-2432303/8794747293
Kulikawn Police Station – 0389-2322379/8794747294
Zonuam Out-Post – 0389-2341463/8794747295
Mobile number tar lanah te hian (Zonuam Outpost tih loh) whatsapp hmangin thlalak pawh a thawn theih vek.