Lunglei district Congress committee (LDCC) president C Lalhmingliana’n sorkarin Lunglei district mipuite a hlamchhiah hle nia a hriat thu sawiin, Lungleia MCS post 20 awm turah officer 9 chauh dah an ni” a ti.
Congress Bhavan, Lungleia political session-ah he thu hi nimin khan LDCC president chuan a sawi a. “MCS officer te hna an kawp tir vak vak a, mipui anmahni dawrtute tan hun leh tha, sum tam tak paih ral a țul phah leh dawn a, khawi Office zawkah nge an dawr tur MCS officer chu a thut dawn ti a buai reng a ngai ang” a ti.
Addl DC pahnih awm turah pakhat chauh a awm tih sawiin, LDCC president chuan 1 SDC post 3 chu MCS officer 1 kawp tir vek a ni dawn a, a ni hian Revenue, planning bakah DC office-a Revenue te a kawp dawn niin a sawi a. SDO (S)-in Election officer leh Printing & Stationery a kawp dawn nia sawiin, Lunglei Municipal Council inthlang mai tur a an sawi laia Election officer hranpa Lungleiin a neilo tur chu hna a chak dawn lo tih a chiang hle niin a sawi.
DCSO pawh DLAO nen kawp tir niin a kawptu chuan thla 6 vel leave a la leh dawn nia sawi a nih thu LDCC president chuan a sawi a. “Kan sorkarin hetiang ringawta Lunglei Dist a enkawl hi a rilru natthlak a, khawiahnge kan rulling MLA te an awm tak? Lunglei hian chhantu a mamawh a, by-pass road kan mamawh em em pawh engtikahnge hma an lak ang tih chu inrinsiak a ngai ta’ a ni” a ti.
LDCC president chuan Edn. Minister-in mipui ten sorkar sikul an bawh ta chu ‘sorkar ah rinna an nghah vang a ni’ tia a sawi pawh “A nihna takah chuan kan economy chhiat vang a ni” a ti a. “Sorkar sikul hi a tha ta thut tihna a ni lova, he sorkar hian tha thut tur pawhin a buatsaih lo. Anihna takah chuan tuna sorkar sikul tha nia an sawi pawh Congress sorkar laia Model sikul atana an siam te niin, subject teacher leh Headmaster recruitment rule an siam vang zawk kha a ni. MNF sorkar hian Congress sorkar zar an zo zel zawk a ni” a ti bawk.