BJP hruaitu, Union home minister ni bawk Amit Shah-a’n North East state 8-a zirna in-ah te Hindi tawng zir ngei ngei tura duan a nih thu a sawi, April ni 7, 2022-a India ram chanchinbu hrang hranga lo lang chu MZP-in tha an tih loh thu an sawi.
MZP chuan “North East state hrang hrang ami ten mahni state hnam ṭawng an hman lai leh mahni pianpui ṭawng hmang tura nasa taka hmalak a nih mek laia Hindi tawng zir ngei ngei tura hmalakna awm chu hriatthiam har an tih thu an sawi a. North East Region (NER)-ah Hindi ṭawng compulsory-a hman chuan hnambil ṭawng leh pianpui ṭawng nasa taka a khawih dal theih dawn bakah zirlaite tân phurrit a nih theih dawn avângin a hmaa kalphung pangngai hman chhunzawm a nih theihna tura hmalak zel an tum thu an sawi.
He thil hi BJP-in RSS changvawn – ram pakhat, ṭawng pakhat, sakhaw pakhat tihpuitlinna tura an hmalakna leh ram leilung fate nuaibo tumnaa an ngaih thu MZP chuan an sawi a. He thuchhuak hi hnuhkir a nih thuai theihna tura hmala turin thuneitute an ngen. Hemi chungchanga North Eastern Students Organisation (NESO) hmalakna pawh an thlawp zel tur thu MZP chuan an sawi bawk.