Pakistan ram rorelna in, parliament chuan rintawk a hlawh loh avanga Imran Khan-a paih thlak a nih hnuah an prime minister thar atan Shehbaz Sharif chu an thlang chhuak ta.
Thawh\annia rorelna ina prime minister tur thlan a nih hma hian Khan-a kaihhruai, Pakistan Tehreek-e-Insaaf (PTI)-a rorel khawl member zawng zawng chu an bâng a; prime minister vawi thum lo ni tawh, Nawaz Sharif-a nau, Sharif-a thlanna chu an duh lo (boycott).
Sharif-a hi Thawh\anni zan vek khan lak luh hman tura ngaih a ni.
Prime minister thlanna hi venhimna khauh tak hnuaia kalpui niin National Assembly pawh theihna kawngpui zawng zawng danchah vek a ni.
Sharif-a hi Khan-a paih thlak a nih theih nana eptu \angrualte kaihruaitu kha a ni a, a kaihhruai sorkar chuan an ram eibar dinhmun chawikan a tiam a, politics-a amah lo do tawhtute laka phuba a lak loh tur thu a sawi bawk.
Kum 70 mi, Sharif-a hi industrialist chhungkua a\anga chhuak niin tunah erawh politics-a huhang ngah tak chhungkua an ni tawh thung.
Kum 2018 khan National Assembly-a \hu thei tura thlan tlin niin ei ruk avanga dam chhunga vantlang rawngbawlna hna thawk thei lo tura a u hrem a nih hnu a\angin Pakistan Muslim League-Nawaz (PML-N) party chu a kaihruai \an a ni.
Cricketer \hin, Khan-a hi Inrinni zan (Pathianni zing) khan prime minister a\anga paih thlak niin eptuten parliament-a amah rintawk lohna an put luh buknaah eptute hian vote 174 hmuin hnehna an chang a ni.
Paih thlak a nih hnuah Pathianni khan a kaihhruai, PTI mi leh sate chuan Pakistan khawpui lian hrang hrangah amah thlawpna an lantir nasa.
Political analyst Zahid Hussain chuan, “Kawng zawh lian tham tak tak hian Khan-a hi hruaitu lar tak a nihzia a la lantir a ni,” tiin a sawi.
Tunge Shehbaz Sharif?
Mian Muhammad Shahbaz Sharif-a hi September 23, 1951-a piang niin Pakistan Muslim League-N party president nihna chelh lai a ni.
Punjab province-ah chief minister vawi thum lai lo ni tawhin Punjab chief minister ni rei ber a ni.
Kum 1988 khan a vawi khat nan Punjab Provincial Assembly-a thu tura thlan tlin niin kum 1990-ah National Assembly member atan thlan zui a ni.
Punjab Assembly-ah hian kum 1993 khan thlan leh niin Opposition Leader a ni zui a. Chief minister atan hian kum 1997 khan a vawi khat nan thlan a ni a, kum 1999-a sipaiten an rama ro an rel khan an chhungkuain Saudi Arabia-ah an tlanchhia.