Aizawl: Environment venhim kawngah hmalakna nasa zawk a awm loha tun ang renga a kal a nih chuan Mizoram hi chenna tlak lohah a awm thei mai dawn nia ngaih a ni.
MIZORAM FIRST buatsaihin Nilaini kalta khan environment humhalh chungchanga inrawnkhawmna Aijal Club-ah neih a ni. He hunah hian Mizoram environment chhe mek siamthat leh venna tur kawng hrang hrangte sawi ho a ni.
Environment humhalh chungchanga ngaihpawimawh hmasak tur leh hmalak dan tur inrawnkhawmnaah hian kalkhawmte chuan, sorkar leh pawl angin kawng hrang hrangah hmalakna a awm tih sawiin, heti chung hian hmabak tam tak a la awm ngei tih sawi chhuah a ni.
Hemi chungchangah hian Mizoram hian neitu rilru tak tak pua enkawl a mamawh takzet thu sawi chhuah a ni a. Tuna kan kal anga kan kal chuan rei loteah Mizoramin tui, ramngaw leh leilung atanga kan hmuh kan mamawh tam tak hi hmu loin Mizoram hi chenna tlak lohah a awm thei mai dawn a ni tih sawi chhuah a ni. Sorkar, pawl leh mi malin kan tihtheih tam tak a awm laiin, zirlaite thinlungah environment venhim pawimawhzia thuk taka tuh a tul zia an sawi bawk.
MIZORAM FIRST chuan environment humhalh kawnga thawk mekte nena thawhho zel an tum tih an sawi a. Sorkar, pawl leh mi mal thahnemngaite thawhpuiah a sawm vek bawk.