District council inthlan a ngaihnawm chho zel e
Mara Autonomous District Council (MADC) inthlan a hnai chhoin, party hrang hrang a phur chho hle a, party lian hrang hrang pawhin bial kima chuh ngei tumin, hma an la nasa hle. Hetih lai hian rampum huapa thawm na, member pawt na thiam leh huhang ngah chho mek ZPM lam erawh chuan bial riat chauh an chuh dawn thung.
Titi a sawi a nih dan leh luhchilhtu hre zawkte sawi danin state a rorel lai MNF in candidate an siamah lungawi lo tam tak an awm a, heng mite hian mi engemawzat an pawt hek ngeiin a rinawm. Chutihrual erawh chuan heng MNF atanga seat chang ta lote hian party dang atanga din aichuan independent-a din mai an hreh lo zawk lehzel a, district council inthlan ngaihnawm tak a nih chhoh a rinawm zel e.
Party hrang hrang hotute pawhin an thusawiah fimkhurin, sawisual neih an hlau chho tawh hle a, mipui rilru hmin ngei tumin theihtawp an chhuah mek bawk. Khawsak la harsa zual tak takte tamna lam a nih miau avangin a neite tan chuan tling mai tura inrinna pawh a awm ngeiin a rinawm a, chutih rual erawh chuan mihring kan fing tawh a, sum leh paia inhralh duh lo, mahni chhia leh tha hriatna hmanga candidate duh ber vote keuh tum pawh a tam zawk an awm tih hriat thar a tha awm e.
Engpawhnise, MNF, Congress leh BJP te hi inbeina zual tura beisei leh rin an ni a, eng sorkar nge piang ang tih hriat ni lo mah se, a tling apiangin sorkar tha an siam ngei theih nan tun atanga party hotu hrang hrangte pawhin ruahmanna an lo siam lawk a tha ngei ang.