Aizawl : Tun thla ni 14 atanga ni 20 thlenga hman tur -fire service week- chu Ningani atang khan Fire service day/Martyrs day-a hman tan a ni a. Kumina fire service week thupui -learn fire safety, increase productivity (I neih sa a lo pun leh zual theih nan kangmei laka fimkhur zir ang che)- tih chu hman a ni.
Fire service week hman tan ni-a Martyrs day/comemmoration day parade chu Aizawl ah chuan Fire & emergency services Hqrs., Aizawlah zing dar 7-ah hman a ni a. Aizawl pawn lama Fire station tinah zing dar 9 ah hun an hmang bawk.
Martarte sunnaah hian kum 2021 chhunga kangthelhnaa leh duty kaihhnawiha thi – Sh. Rabindra Mishra, Leading fireman, Bihar Fire service ami leh Sh. Balu Damu Deshmukh, Fireman rescuer, MIDC, Maharastra ami te sunna hun hman a ni.
Mizoramah chuan tun thla ni 18, chawhma dar 11-ah sorkarin a ruahman angin department/office hrang hrangah Fire service week pual thuchah chhiar chhuah a ni dawn a. AIR leh DDK atangin thuchah leh sawihona tihchhuah tum a ni bawk.
Sorkar hmun pawimawh thlan bikahte Fire safety audit neih tum a ni a, school hrang hrangah Fire & evacuation drill cum lecture & demonstration neihchhohpui mek a ni a. High school zirlaite tan essay ziaka inelna buatsaih a ni bawk ang.
Kum 1944, April ni 14-ah Indo lawng lian, ralthuam leh bomb lam chi tam tak phur ‘S.S Fort Stikine’ chu Mumbai lawng chawlhhmunah a kang a. He kangmei chhuak rapthlak tak thelh tuma beitu zingah Bombay Fire brigade mi 66 leh Bombay Salvage corps mi 11 in nunna an chan a, heng mi te hriatrengna atan hian Fire Service Day chu April 14-ah hman thin a ni ta a, April 14 – 20 chhung chu Fire Service Week atan hman thin a ni bawk.
Director general (fire), Ministry of home affairs-in hnathawh that avanga kumin Fire service week-a chawimawina -Commendation Disc & Certificate- dawng tura a thlan zingah Mizoram fire & emergency services mi 5 – STO Lalremtluanga Varte; STO Lalremmawia; Fm Lalbiakhnuna; Fm Laldanzira; Fm Jonathan C. Lalruatfela(Posthumous) te a thlang a ni.