Chanmarians Cricket Club chuan Mapuia Memorial Mizoram Cricket League-ah duhthusam a bul an tan chu an chhunzawm zel a. Ningani khan Kulikawn Cricket Club run 30 in an hneh.
Vuak thlang Chanmarians tan opener Lalhmangaiha chuan run 34 a siam a. Run siam chak harsatna pitch-ah run 17 siam Saidingliana Sailo nen an din dun laiin run 42 an vaw chhuak a. Over 20 chhunga an team in run 90 an siam theih chhan an ni.
Kulikawn bowler zingah Parvez Ahmed chuan wicket thum a la a, Nasib Rai-a’n maiden over vawikhat a vawm bakah wicket hnih la in a vawm tha bawk.
Kulikawn in chak tura run 91 an mamawh chungin beisei angin ball an vaw lo. Opener C. Lalrinsanga chu Chanmarians captain Bobby Zothansanga’n a wicket a la thuai a. Lalfakzuala Renthlei chuan wicket hnih la in a chhunzawm a. Lalnunkima Varte leh Gilbert Libian Kullu ten wicket hnih ve ve la in a tawp lam an khar a. Kulikawn in over 18.5-ah run 60 bak an siam thei lo.
Inkhel hnuhnung zawkah Chhinga Veng Cricket Club in tun MCL 2022-ah a vawikhatna atan hnehna an chang a, Bawngkawn South Cricket Club run 48 in an hneh.
Toss a vannei zawk Chhinga Veng in an vaw hmasa a, an opener te wicket tla hma mahse run 22 ve ve siam K. Vanlalruata leh Lalruatdika ten third wicket partnership mumal zawk an nei hman a. An innings tawp lama ball 27 atanga run 45 siamtu Sumit Lama che tha bawkin 3C hian over 20-ah run 147 an siam.
Bawngkawn South bowler pahnih Lalrinfela leh Zoramthanga ten wicket hnih ve ve an la.
Bawngkawn South hian an vuakin over 8-naah wicket thum an hloh an tuar a. Over 20 ding tluan mahse run an siam tam thei lo. Ball 23 atanga run 26 siam Arbin Shahi leh a tawp thlenga ding Moses Ramhlunmawia (18*) ten theihtawp chhuah mahse over 20 chhungin run 99 an siam a, wicket 8 an hloh.
Chhinga Veng bowler zingah Sumit Lama, Lalhruaimawia Ralte leh Rosiamliana Ralte Junior ten wicket hnih theuh an la.