Health & Family Welfare board vice chairman, Champhai North bialtu MLA ni bawk ZR Thiamsanga’n Champhai District hospital-ah Rs. vaibelchhe 21.38 sengin khum 50 awmna critical care centre dah tel a ni dawn tih a sawi.
Champhai khawpui thianghlim, mawi leh hrisel siam tura hmalatu Clean, Beautiful and Healthy Champhai Town Committee thutkhawm Inrinnia Champhai-a neihah he thu hi ZR Thiamsanga chuan a sawi a. Khum 50 awmna tur Ayush Hospital pawh din tuma hmalak a nih thu a sawi bawk.
ZR Thiamsanga chuan Champhai cheimawina tur te, faina kawngah leh hriselna kawnga hmasawnna turah he thutkhawma kalkhawmte tanhona chu a innghahna lungphum a nih thu a sawi a. Champhaia sorkar hmalakna hrang hrang sawiin, Champhai – Aizawl double lane-a siam mek a nih thu leh JJM hnuaiah ni zung chakna hmanga tuilakna kalpui thuai tum a nih thu a sawi.
Champhai North bialtu MLA chuan Champhai Bazarpui pawh tlawhin, a dinhmun te a enfiah a. Bazar hlui tawh cheithat leh thawmthat ngaite endikin, District marketing officer Vanlalpara’n Champhai Bazarpui dinh- mun tlangpuite a lo hrilhfiah a ni.
Clean, Beautiful and Healthy Champhai Town Committee thukhawm hian kum 2019 a bultan sub-committee pathumte hmalakna leh hmachhawp te leh rawtna awm te an thlirhova. Mizoram youth commission hnuaia Champhaia coaching centre dahna tur hmunhma chungchangte an sawiho bawk.