Pathian hmel lantirtu atan hmang tawh ila
Kristian tamna state kan ni a, zaa za inti ngam chiah tawh lo mah ila, a tam zawk erawh Kristian sakhaw vuantute kan la ni. Hun pawimawh Krismas leh Kumthar vuakvet zo tawh mah se, Covid-19 hri leng vanga kum hnih chuang kan hman theih tawh loh Good Friday leh Easter Sunday te ralmuang takin kan hmang leh thei ta a, kohhran hoten nuam kan tiin, Pathian biakin leh a vela kan thawm leh chetzia hmuh a nuamin, ngaihthlak a nuam hle.
Pathian fapa kan aia a thiha a thawhlehna ni hi urhsun taka hman a ni hlawm a, tisa leh thlarau lam ruai ropui tak kohhran hoten kan theh hlawm ni pawhin a hriat. Hri leng vanga kan mangan a, kan hma hun tur kan ngaihtuah thiam tawh loh laia Pathian hnathawh ropui tak lo lang hi a lawmawm a, am taka hmang tur pawh kan ni reng bawk a ni.
He kohhran hote hunpui hian rah tha chhuah chho zel se la, min hmangaihtu hmangaihna hre thar chunga keimahni pawh inhmangaihtawn a, inrem lote pawhin inremna an neih thar theih nan hmang tlang ila, kan thinlungah Kristian mei chhi nungin, Kristian nun dan dik min kawhhmuh thartu lo ni mawlh teh se.
Kohhran hrang hrangte pawhin kan hman dan inang lo hlawm mah se, Pathian biak ina kan nun leh felnate titawp mai lo in, inthenawm khawvenna kawngah te min ti thartu niin, kan nunah Pathian hmel tilang ila, kan hnathawhna leh kan eizawnna kawng hrang hrangah ralmuanga hun kan hman theih leh takna hian rah tha rawn chhuah thar ngei bawk rawh se.