Easter Sunday: Kum hnih hnuah Mizorama
kohhranten lawm leh thei ta

Aizawl : Aizawl: Khawvel mihringte chhandam an nih theihna atana khenbeh Isua Krista ropui taka a thawh lehna ni, ‘Easter Sunday’ chu hri leng avanga kum hnih hman mumal theih a nih loh hnuah nimin khan Mizorama kohhranten ropui takin an lawm.
Salvation Army band party-te chuan khaw var rualin hmun hrang hrangah ‘A tho ta’ tih hla remin thihna hnena Isua Krista thawh lehna ropui tak chu an puang a. Kohhran thenkhat pawhin Easter Sunrise Services hun an hmang bawk.
Easter Sunday hi Mizorama kohhran pawl hrang hrangte chuan lawmin, chawhma, chawhnu leh zanah te an inkhawm a, kohhran tam zawkin chawhma inkhawm banah thingpui ruai an buatsaih.
Presbyterian Kohhran chuan Easter Sunday inkhawmah hian Synod atanga thupui thlan sa hmangin thuchah an ngaithla a, chawhma inkhawmah thuchah ‘Thawhlehna ropui’ tih a ni a, chawhnu inkhawmah ‘Tho leh Lalpa hmutute chu’ tih leh zan inkhawmah ‘Amah ngei hi a lo kal leh ang’ tih thupuite an ngaithla a ni.
Kohhran pawl dang thenkhatin thupui an neih laiin, pawl thenkhat chu thupui thlan bik an nei a, hun hmangtuten Isua thawhlehna chungchang an sawi a ni.
Kristiante ni pawimawh, Easter Sunday hi kum 2020 khan hri leng avangin hman theih a ni lo a, veng leh khaw hrang hrangte chuan aurinna hmangin mipui chhim theih turin hun buatsaih a ni a, nikum 2021-ah chuan Biak In hawn theih ni mahse hun pangngai anga ropui taka lawm theih a ni lo.
Kumin hri leng a ziaawm a, mipui khuakhirhnate pawh thlah zalen a lo nih chhoh takah chuan kohhran mipuiten Easter Sunday hi ropui takin an lawm a, kohhran pawl hrang hrang Biak Ina leng lo khawp inkhawm an awm deuh vek a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427