Aizawl: Chief Minister Zoramthanga chuan hun khirh leh harsaah pawh MNF sorkarin hmasawnna hna a thawk a, thuanawp lovin hma lam a pan zel tih a sawi.
He thu hi nimina Lawngtlai a tlawhnaah a sawi a, sorkarna an chan hnuah Covid-19 leng te, vawk pul hri leng te, Myanmar ralte an hmachhawn tih sawiin, “Hun harsa tak hmachhawnin Pathian hruaina avang liau liauin kan paltlang tlang chho mek,” a ti.
Mi thenkhatten hun harsaa MNF party-in rorelna a chang chu anchhia ang lek leka sawi an awm tih sawi langin, heng hun harsaah hian Pathian chuan entir duh a nei a, chu lam chu mipuiten an thlir thiam a tul tih sawiin, hun khirh leh harsaah pawh MNF sorkar chuan hmasawnna hna a thawkin, thuanawp lovin hma lam a pan zel zawk tih a sawi.
Zorama chuan SEDP hnuaiah chhungkaw sing ruk atanga sing sarih vel hnenah a bultan nan Rs. 50,000 theuh sem an ni dawn tih sawiin, assembly bial tinah chhungkaw 1,500 aia tlem loin an dawng dawn tih a sawi.
Chief minister hi Thawhtanni zan khan Lawngtlaiah a riak a, vawiinah May 5-a MADC inthlanna neih turah an party tan campaign turin Lawngtlai chhuahsanin Siaha district a pan leh dawn.