India ramah darkar 24 liam ta chhung khan mi 2,183-in Covid-19 an kai tih hmuh chhuah aiin 90% dawnin an tam zawk a, hri a leng thar leh mai hlauhthawnna a lian hman hle.
A hma niin mi 1,150 kai hmuh chhuah niin darkar 24 liam ta chhunga hmuh chhuah hi 89.8% zetin a tam zawk.
Darkar 24 liam ta chhung hian mi 214 an thi leh hman bawk a, heng zinga mi 212 erawh Kerala-in a hma lama thi tawh, tlaikhawhnua an chhinchhiah thar a ni a. Heng zinga mi 62 hi court-a an thih chhan tihchian an ni chauh va, he state-ah hian April 13 leh April 16 inkarah mi 150-in hri leng hi an thihpui.
Darkar 24 liam ta chhunga sample endik atanga a kai hmuh zat, daily positivity rate pawh a hma nia 0.31% chu 0.83%-ah a kai bawk.
Hri kai enkawl lai erawh tlemin a tlahniam thung a, mi 11,558 atangin 11,542-ah a tla a. Mi vaibelchhe 4.30 chuangin hri hi an kai tawh.
Khawpui ber, Delhi-ah pawh hri kai an pung hluai a, mi 517 zet hmuh an ni a. Enkawl lai mi 1,518 awm mekin March 3 hnu lama a tam ber tum a ni.
Delhi-ah hian a thenawm, Ghaziabad leh Noida nen sikul naupang zingah hri kai hmuh an awm nual a, zirna in khar pawh sawi rik a ni tawh.
Hetianga hri kai pung leh hluai hi state tinin Covid avanga inkaihhruaina an thlahdul mek zel laia thleng a ni a. State thenkhat phei chuan vantlang zinga hmai tuam pawh ngei ngei tura tihna an hlip tawh a. Hetianga a pun leh avang hian mi tam tak hlauhthawnna a siam nghal hle a ni.