Aizawl: Mizo tawng humhimna atana duan, Budget Session liam taa an pawm, Mizo Language- Development Board Act chu nimin khan sorkarin gazette-ah a chhuah ta.
Kumin March 10 khan Assembly House-ah Mizo Language Devlopment Board bill put luh chu pawm a ni a, March 15 khan he bill pawm tak hi larsapin a pawm leh a ni.
Thu dawn danin gazette-ah a chhuah tak avangin sorkarin Mizo Language Board hotu tur, ruat a nih theih nan search committee a din leh dawn a ni.
Mizo Language Development Board office tur hi sorkar chuan a ngaihtuah mek a, office atana an ruahman, Mizoram Youth Commission office thin chu nimin khan Education Minister Lalchhandama Ralte leh Human Resource Development Board Vice Chairman L Thangmawia, MLA ten an en a ni.
Education Minister Lalchhandama Ralte chuan tawng leh thu leh hla lam a, hma kan sawn zel theih nan Mizoram sorkarin theihtawp a chhuah tih sawiin, he board-in a rang thei ang bera hna a thawh theih nan thawktu hrang hrangin theihtawp an chhuah mek tih a sawi.